女團COLLAR成員Marf邱彥筒，日前推出年度第三首單飛作品《海》，為配合主題，Marf專誠到龍蝦灣石灘出海拍攝MV，身穿單薄襯衣的她，在天氣轉涼的情況仍然落水，在風浪下由朝拍到晚，她說：「唔想辜負歌名，想畀大家見到海，置身海中、聽海浪聲嘅感覺，希望用畫面去呈現。」雖然在鏡頭前，Marf在水中呈現出舒服感，但鏡頭後，Marf卻凍得騰騰震，身穿單薄襯衣的她，每次Cut機都要穿上羽絨保溫。縱使拍攝過程「艱苦」，但她依然可以苦中作樂，Marf指：「冇諗過呢度係熱門散步嘅地方，見到有好多狗，當我拍攝期間，畀個假髮箍到個頭就快裂開嘅時候，有兩、三隻唐狗向我投懷送抱，令我有一種好安慰感覺。」
此外，《海》是Marf繼《I’m Marf-elous 》後，再一次為MV落水拍攝，未知兩首歌曲是否有前後呼應？Marf認為兩首歌可以說是記錄她的成長及對事情想法：「兩首歌嘅MV都係同一個導演，同佢感受上、諗法會容易Connect，再次同佢合作，第一下諗法就同《I’m Marf-elous 》關連番；兩首歌可以話係講唔同時段嘅我，之前《I’m Marf-elous 》講堅強堅毅突破難關，面對困難依然係搏到盡，而今次都係面對困難，但就會平靜好多，其實硬淨一段時間，都會攰，攰就要搵出口，而呢首歌就做咗個出口畀自己。上次首歌講我被捉去做實驗，所以不斷逃跑，今次我喺海上飄浮，已經唔記得所有發生過嘅事，煩腦冇咗，海洋將所有事情沖淡。」
