華語影壇著名導演陳可辛日前現身香港電影資料館「星級影談」系列活動，與觀眾重溫其2005年華麗歌舞巨作《如果·愛》。剛於成都完成新片《明天，會更好》拍攝的他，經過連續32組chur爆拍攝，比預期早五日殺科，隨即趕回港半日出席活動，之後又要飛返去處理後期製作。陳可辛笑言：「我都無諗過我仲chur到32組拍完一部排咗40組嘅戲，感覺好似返返去UFO年代拍《風塵三俠》《金枝玉葉》嘅狀態咁，成個人都好亢奮。」活動上他更特別邀請了與他合作無間的編劇林愛華作為驚喜嘉賓，兩位老拍檔在台上分享當年拍攝幕後故事。
相隔多年重看《如果·愛》，陳可辛感觸良多，特別提到2004年第一次到北京拍攝時，正值北京為準備2008奧運大舉改建，周圍都是地盤、建築吊臂和廢墟。「去到見到啲廢墟覺得好靚，好有質感好好睇，但因為好多嘢都喺嗰陣時開始拆，所以嗰時係一路拆一路拍，我哋就keep住追呢啲景嚟拍。」他透露戲中呈現的北京正是現今最旺的三里屯SOHO區，慶幸用菲林紀錄了那個時代的「老北京」。他亦大膽直言不喜歡歌舞片，但偏偏歌舞片可以令他直白講出心聲：「因為我好鍾意好多嘢都講得好白，而喺創作過程有歌舞呢樣嘢，平時喺對白講唔到好白，就可以用歌入面嘅歌詞幫演員做心聲唱出嚟，之前成日俾人鬧我太白，依家可以攞正牌講出嚟。」
談及《如果·愛》女主角周迅，陳可辛相隔21年再與她合作新片《明天，會更好》，他大爆與周迅認識多年，到現在依然覺得她太單純天真兼戀愛腦！「本身我心目中係想要一個寫實啲，更加血淋淋嘅《甜蜜蜜》，《如果·愛》周迅演個角色要再狠心啲功利啲，但佢演嘅時候都係演得好愛個男主角，唔夠狠。」他舉例戲中一幕跳上巴士與金城武道別，明明應該頭也不回，才符合他心目中蛇蠍美人(Femme Fatale)的形象，「點知拍極佢係都要回頭望，仲問我點解唔可以咁愛佢，真係俾佢吹漲。」陳可辛笑言新片再合作時，以為周迅多經歷後會改變，誰知「隔咗21年之後佢都仲係咁單純天真，我真係服咗佢。」
至於男主角金城武，陳可辛透露一開始就鎖定由他演出，但刻意等到他過了30歲才合作：「由金城武好後生嗰時開始，已經好少有啲小鮮肉係連我哋男人都覺得好睇。因為啲靚仔通常都係花弗啦、油頭粉面，而金城武我認為係少有靚仔到男女通殺，男人見到佢都覺得『嘩！就算女朋友俾佢搶咗都無話可說啦』。」他更自嘲唔識拍二十幾歲後生仔的故事，「所以一路等，等到佢過咗三十歲就寫呢個角色俾佢。」這部戲亦令二人成為好朋友。
編劇林愛華則大爆與陳可辛合作的痛苦經歷，指寫《如果·愛》超過二十稿：「其實喺UFO時，李志毅已經同我講過話陳可辛今日同你講黑，其實可能係白，然後聽朝就會將白轉返黑。同佢寫嘢就唔好跟車太貼，因為佢係好鍾意傾劇本，所以係會不停咁變。」她坦言過程辛苦，曾寫到所有版本都出齊，不知還能寫什麼，「佢好追求精益求精，就好似唧牙膏咁要唧到最盡，所以變咗你幫佢寫劇本係好痛苦。」
