早年活躍於樂壇，有「金牌經理人」之稱的黃柏高（Paco），九十年代起捧紅過不少歌手，如陳慧琳、蘇永康、古巨基、許志安與鄭秀文等，曾視工作如命的他，既是經理人，又涉獵音樂、電影等範疇，直至身體響起警號才決心停工休養。Paco近年痊癒後一直深居簡出，注重養生，最近被一把聲音打動「出山」，再次面對鏡頭，回望曾經「多謝Paco！」的風光日子，一切都只是浮雲，如今在音樂與電影發展上，Paco寧願要獎金多過獎品。
亞洲各地的娛樂事業，如日本、韓國近年開始發展Virtual Singer（虛擬歌手），像千禧年的初音未來，到近年的K-pop AI虛擬偶像，愈玩愈大。
為香港樂壇貢獻良多的Paco，早在十多年前已經有這個概念，不過限於香港資源，一直未有踏出這一步，想不到養病加上疫情期間，出現一把聲音，讓Paco有動力再次實現這個理想。
被「老虎歌皇」聲音感動
已多年沒有接受訪問的Paco，近年在內地專注動作電影製作，這次帶來一位香港唱作人「老虎歌皇」受訪，Paco說︰「十幾年前，我已經想創造一個Virtual Singer，畫面可以係動畫做一個形象，但需要一個幕後歌手，『老虎歌皇』一直都是幫我唱demo，再sell俾啲歌手，歌手肯接受首demo，唔多唔少都因為佢把聲，唱得好容易感染到人，歌手就容易接受首歌，佢一路都喺網絡上唱cover，改編人哋嘅歌。我同佢講，咁樣你只係一個口水歌手，我鼓勵佢，不如你自己創作，你自己做返首歌，當係我送俾你呀，當一個紀念又好，咁就出現咗《上帝話事》呢首新歌，呢首歌兩年前已經製作好，依家係時候推出喇！」
新歌錄好，如何推出市場？「老虎歌皇」一開始已決定不露面，他解釋自己性格比較內向，最重要是戴上面具後唱得更放，Paco續說︰「最大個問題，我哋點樣去present呢？佢喺網絡上帶住個老虎mask，雖然呢個大家都認同，但MV上可以點玩？你唔可以咁樣行來行去就算，半年前我製作緊電影時，遇到一間好好CG公司，呢間CG公司老闆，原來佢都係聽開『老虎歌皇』唱歌，一邊聽住一邊工作！我一講，佢就已經好投入，已經明白我想要乜嘢，一拍即合，用AI嚟present，一做好個MV就即刻推出嚟，因為今日嘅AI，大家仲可能覺得好前衛，但過多一個月呢，技術又有進步，又有嘢取代㗎喇，呢個project希望能夠打動到多啲年青觀眾，去返聽主流廣東音樂，呢個就係我嘅宗旨。」
已離開香港樂壇一段時間的Paco，仍有留意樂壇發展，他近年看好MC張天賦，「我覺得偶像和實力，永遠一齊就最理想，香港好似《中年好聲音》，全部都係唱口水歌，國內綜藝節目就講飆音，其實你唔會想聽王菲飆音啩？咁唔會動聽，要打動到觀眾先係最重要！近年比較接近主流嘅，我留意到係張天賦，佢比較上係一個正路傳統歌手，好事嚟嘅，香港能夠再有一個咁樣嘅歌手出現。」
問Paco還有沒有再做經理人？他說︰「我都有簽啲動作演員，歌星我咪全力支持吓、配合吓，『老虎歌皇』又唔係偶像派，依家要爭取一個機會係好困難，要爭取一個商演，都要你首歌人哋接受到！有人會話，咁你以前都做過好多天王天后啦，嗰啲係以前，今日時代已經唔同咗，各有各自己平台，有自己規矩，呢個唔係我心目中想做嘅嘢！依家任何一個年輕人都話有個經理人，都唔使我啦，我成日都覺得，作為一個經理人，最大分別係做一個企劃，點樣令佢逐步逐步去實現，唔係做保母，唔係去take care佢每日日常，而係計劃點樣踏去成功之路，我暫時都係電影為主。」
Paco說，現時娛樂事業面對最大的挑戰，是觀眾的耐性，再隨着短視頻的迅速興起，「觀眾係冇時間冇耐性去欣賞，冇機會可以聽十次，尤其抖音等短視頻，大家習慣咗，欣賞要快，乜都要快，所以呢個問題都令到電影業好大打擊，年輕觀眾冇耐性坐喺度四十分鐘，慢慢build up emotion入戲，佢已經瞓着，喺度不停玩手機，已經冇心機去欣賞套戲，個問題就係，時代已經改變晒！」問Paco還有觀看頒獎禮嗎？「有時啦，我唔敢批評啦，一個頒獎禮都係一個鼓勵，我唔係好化，我依家無論電影上音樂上，我都係要獎金多過獎品，哈哈！獎金都叫做有回報，獎品，聽日都冇人會記得你！（還有留戀「多謝Paco！」嗎？）唔會喇，『多謝Paco』只不過我代表一個團隊，其實係好多人一齊努力嘅，其實我都唔想企喺前面，只不過啱啱呢個作品，我有份參與。」
喉嚨出事要電療化療
談到經歷過的一場大病，Paco一直未有對外說明病情，這次他透露了多一點，「有咗一個都幾嚴重嘅病，喉嚨出事，真係可以就咁玩完！當你有病，你就明白健康係幾重要，你真係要停頓晒所有嘢，其實係好辛苦嘅，身心都係，接受呢個治療時係好困難，都捱咗成年，唔輕易，喉嚨吐血呀、要電療呀、化療呀，我以前係飲『生命之水』，就係威士忌，依家真係飲水啦，絕對唔會好似以前咁瘋狂！以前係錯誤地瘋狂，我以為自己識欣賞，自己又好勝，我成日都想話，唔好俾酒控制，但當我飲第一口嗰陣，其實就俾酒控制咗，依家托賴，正常啦，所以希望能夠珍惜，我可以完成我心願，目標係我繼續做到音樂，繼續可以發展到電影製作，希望五年之內，可以製作到更多動作電影，所以我要更加珍惜身體。」
Paco在休息前，接手的最後一單「大嘢」，就是許志安出軌事件，他說：「發生咗，老實講你都要面對，都唔係話叫拆彈，咁多人認識，又做得唔啱嘅，你公開認錯，希望大家俾到個機會，站喺男性角度，你勇於承認解決呢個問題，但女性角度呢，你永遠都係唔啱嘅！（你都係睇報道先知？）之前都有風聲有透露，咁就更加要速戰速決，唔係就愈描愈黑，公開交代成件事！我一路都鼓勵佢，永遠都會有人提返起以前嘅嘢，但希望盡量淡化囉，唔可以抹殺佢曾經嘅努力，佢啱啱去完美國登台返嚟，狀態幾好，係囉，其實一早要做啦，早在疫情之前已經出嚟做啦，疫情之後個個湧出嚟，變咗你個機會又低咗，其實個timing好緊要，佢嚟緊Big Four（張衛健、許志安、蘇永康及梁漢文）香港開騷，冇問題啦！」
說到遺憾，Paco仍很記得陳僖儀（Sita），二O一三年遇上車禍離世的女歌手，終年只有二十六歲，「呢個太突然喇！佢係我加入舊公司（太陽娛樂音樂）最長期發展的一位女歌手，係一個好有potential，佢唱得好好，真係好可惜，一個意外就已經結束，咁年青，佢當時已經逐步受歡迎，唔係我刻意或者用好多錢去鋪排，而係佢嘅表現好吸引大眾，又係一個好上進、好有機會嘅女歌手，所以大家真係要珍惜，好似早兩日睇到方大同咁，咁年青咁有才華，曾經爭取同佢合作，嗰時我同薛凱琪同埋佢經理人，以前喺華納合作過，我哋都安排見過兩次面，但最終都冇機會可以合作到，但我十分欣賞佢。」
