資深電影人林谷薇麗本月2日離世，終年73歲。家屬訃告指於5月14日設靈，翌日移靈聖約瑟堂舉行儀式，之後奉移歌連臣角火化。林谷薇麗（Linda）夫婿為金源米業集團主席林炯熾，弟弟為谷德昭，姪女為谷祖琳。
谷德昭今日凌晨在社交網貼上兒時及長大後與家姊的合照，發長文悼念：「林谷薇麗LINDA，我二家姐，細個嘅時候好乖，讀書好叻，香港大學畢業。跟住佢加入咗麗的電視做助理編導，佢好享受佢嘅工作，認識咗好多有趣嘅人，佢哋都成為咗二家姐一生嘅好朋友。後來輾轉喺新藝城、德寶電影公司擔任要職。傳世作品包括有：縱橫四海、我愛扭紋柴、辣手神探、秋天的童話……」。
谷德昭指家姊婚後生兒育女，除了好照顧自己的家庭外，亦很照顧他這個弟弟，並將愛分給有需要的人，擔任香港血癌基金主席超過20年。他表示自小受家姊的熏陶，開始對電影感興趣。「後來我讀完書返香港，二家姐已經係一位非常成功嘅電影監製，憑住佢嘅關係，我順利加入電影圈，前輩們都因為好人緣嘅二家姐而好關照我。最初二家姐有擔心唔知我適唔適合做電影，幾年過去，我繼續有得做，仲做得唔錯，養得起自己，亦帶俾好多好多好多觀眾歡笑，我見到二家姐面上有為我感到驕傲嘅笑容。」
谷德昭稱與Linda同生肖，性格相近，好好傾，長大後二人愈見親近，他再親熱點叫Linda做「老二」。家姊同朋友食飯都會帶他一起，他們每周都會見兩三次面，每晚都會傾WhatsApp，「老二臨走前嗰晚我哋都有通WhatsApp，佢話個Omakase好好食！」
谷德昭透露Linda是在睡夢中離世：「老二，我記得你曾經講過，如果第日要離開呢個世界，最好就係不知不覺咁喺屋企，瞓覺中離去。天父您突然咁樣召回咗老二，我相信您身邊一定係好等天使用。」
失去了一個二家姊、一個好老師、一個好朋友的谷德照最後說：「我哋會記得，每次你煮好飯，好緊張又好好笑容咁問我哋：『點啊？得唔得啊？有冇食晒啲嘢啊？』有啊老二，我哋食得好開心，每次都食晒你啲嘢。我屋企雪櫃仲有你俾我嘅木瓜仔，多謝你！老二，如果有下一世，希望我哋繼續做姐弟，或者下次由我做哥哥，可以照顧你！Dear sis, I miss you very very very much！」
