衛蘭（Janice）小時候填寫「我的志願」是新聞主播，結果她成為情歌天后，一唱就二十年。
由入行開始，Janice都在大公司下成長，已習慣被包裝、被指揮，大樹好遮蔭的代價，換來是沒有say no的權利，亦令她沒有抵抗力，遇上任何打擊，很容易便被打倒，但也是個祝福，繼續走下去。
出道即橫掃各大頒獎禮新人獎的衛蘭（Janice），適逢當時香港的卡拉OK盛勢，她首張廣東專輯的《一場誤會》、《心亂如麻》、《My Love My Fate》與《大哥》等歌曲，唱得街知巷聞，亦是八、九十後的集體回憶，Janice說︰「我到依家每次唱《My Love My Fate》都好大感受，會諗返當日做黎明演唱會嘉賓，第一次喺紅館唱呢首歌，其實第一晚我就入咗醫院，因為太緊張，個肚好唔舒服，結果第二晚，大家見唔到我上台，但當時都冇特別去解釋，係幾嬲自己，畢竟當時好年輕，只有廿三歲。」
紅得快，當時Janice連靜下來好好思考的時間都沒有，「好多嘢都來得太快，冇時間，真係太忙，每日拍廣告、影好多相、做好多雜誌訪問、錄好多歌，嗰陣係一次過錄十首歌，以前冇得say no！」試過一次「爆煲」，在黎明面前發脾氣，「我記得有一個表演，好似我甩咗歌詞，嗰陣時都係病緊，老闆話我，我就話我都唔舒服啦，你點解仲要話我？嗰陣都幾頑皮，受唔住俾人話，企起身就走咗去，之後諗返唔係好尊重，自己都覺得態度好差。」
二十年經歷不是一條直線
轉眼今年就入行二十周年，Janice即將展開首個大型世界巡唱，問她會否邀請黎明？她笑笑口說︰「我諗都難，哈哈！我諗佢唔想，呢幾年的確少了聯絡，幾年前生日或者聖誕都會message吓，唔知點解又失聯，不如你幫我問佢，哈哈！呢個二十周年好重要，由佢帶住我事業開始，仲有雷頌德，嗰段時間真係好幸運，事業遇到佢哋幫助，遇到好多好歌，所有嘢都好感恩。」
Janice續說︰「二十周年最想同歌迷一起慶祝，好想唱返遇到嘅每一首作品，開騷仲有人去欣賞、仲有人想聽，really？OK！Let’s do it！好想同大家有個memory，其實我好鍾意睇Mariah Carey，好鍾意佢啲舊歌，聽幾多次都唔會悶，我諗大家都一樣，想去聽細個時候陪住你長大嘅歌，今次係入行以來比較大型嘅巡唱，香港站一定有，場地選擇都未知，但我想香港係最尾嗰站，我都想試吓戶外場地，啟德？就算係都應該唔係最大嗰個場館啩！」
這二十年，Jancie用「高高低低」來形容，「唔係一條直線，但我覺得人生經歷過，就算低潮又好、高峰又好，好多時候都需要自己去堅持，可能大家見唔到，當然我都有唔開心、有迷失，有懷疑自己的時候，特別係離開A Music去另一間唱片公司（華納唱片），中間唔知傾唔傾得成？究竟自己事業會變成點？之後再離開第二間公司，我休息了大概兩年，要自己去建立返好多嘢。」
離開華納後，Janice沒有再簽約唱片公司，決定自組公司做獨立歌手，她坦言是跳出comfort zone，「點呢？自己做呀？我唔識㗎喎！I don’t know anything about business，又要經歷一次呢個過渡期，又要再適應，我覺得對我嚟講，做呢件事要好有勇氣，因為一出道就慣咗嗰個模式，俾大家照顧、俾大家決定晒，依家就係自己要諗囉，不過開始慣、開始適應喇，to be honest，踏出呢一步，我覺得返唔到轉頭！做獨立歌手，Yeah！getting there！」
Janice另一個新挑戰，是首次參與內地綜藝節目《聲生不息-大灣區季》，這次亦令她眼界大開，「嘩，拍攝時間好長，好多訪問要講好多嘢，自己好似變咗一個新人咁，係好大挑戰，但我覺得係開心，睇第一季嘅時候，我已經覺得舞台好正，特別係編曲和製作，大家都好細心去做，一路都好希望可以有呢個機會，其實未知道會被邀請之前，自己都已經有上國語課，直到去錄影第一日，我覺得好似一個夢咁，佢哋用心去做每一樣嘢嘅程度，令大家覺得就算幾攰都值得，依家都差唔多拍完，仲差一集，時間過得好快，好唔捨得，同埋好開心今次，同一班歌手朋友好似建立咗一個關係，大家一齊去做一件事，每個禮拜都好期待再見到佢哋，好似薛凱琪、祖兒呀，呢個節目，令到我好似重新愛上廣東歌。」Janice更即場預告，為了二十周年特別造了一首新歌，「好快就聽到，係廣東歌呀！」高高低低二十年後，期待另一個新開始。
封面攝影：Kris Yeung
協力︰Gwen
花絮攝影︰洪志富
形象︰Winnie Hu
協力︰Haley Chau
髮型︰Domanic Tao@Orient 4
化妝︰hongjai_makeup
服飾︰Isabel Marant、Issey Miyake、Maje、Messika、Saint Laurent、Sandro