ViuTV真人騷《全民造星VI》昨日（26日）舉行發布會，總顧問黃慧君（花姐）、音樂顧問徐浩、導師李幸倪（Gin Lee）、梁祖堯聯同其中12位參賽者見傳媒。
花姐提及有網民指她亂揀人，她強調一向公平公正，不單止要揀唱跳好，還要靚仔和有性格，至於邀請李幸倪任導師，花姐說：「前幾輯有幕後曾提議找Gin Lee，我一口拒絕，因以為她好悶，認識後發覺有可愛一面，希望觀眾睇到。」對於「出山」擔任總顧問，花姐自言希望節目愈來愈好睇，「我好自大，覺得有我在會好睇啲。」花姐直認海選時繼續鬧人，令到有些參賽者好傷心離開，被問到這次是否不單止以靚仔來決定入圍資格？花姐說：「不單止靚仔，但都會睇」，又指淘汰了兩個靚仔，「肉都赤埋」，但強調沒有人可代替MIRROR。
李幸倪表示比較着緊參賽者在音樂上的概念，同時會牽涉很多心理輔導部分，「我不喜歡傷害人，對我來講向別人評頭品足有點難，是很大挑戰。相比當無綫《聲夢傳奇》導師形式不同，最大分別今次是真人騷，大家會睇多了導師點樣教，出鏡方面要兼顧多一點」。
梁祖堯透露曾拒絕再任導師，他後來開出條件，「以前有些地方做得不夠好，只顧及節目好不好睇，其實這不是我的責任，我要節目組應承這個要求才做，還要求改賽制，導師不用決定淘汰參賽者，骨肉分離是好睇，但點解要我做這個咁殘忍的決定，今次盡力教好就得」。
更多現場圖輯：
