轉眼今年就入行二十周年，衛蘭（Janice）即將展開首個大型世界巡唱，問她會否邀請黎明？她笑笑口說︰「我諗都難，哈哈！我諗佢唔想，呢幾年的確少了聯絡，幾年前生日或者聖誕都會message吓，唔知點解又失聯，不如你幫我問佢，哈哈！呢個二十周年好重要，由佢帶住我事業開始，仲有雷頌德，嗰段時間真係好幸運，事業遇到佢哋幫助，遇到好多好歌，所有嘢都好感恩。」
這二十年，Jancie用「高高低低」來形容，「唔係一條直線，但我覺得人生經歷過，就算低潮又好、高峰又好，好多時候都需要自己去堅持，可能大家見唔到，當然我都有唔開心、有迷失，有懷疑自己的時候，特別係離開A Music去另一間唱片公司（華納唱片），中間唔知傾唔傾得成？究竟自己事業會變成點？之後再離開第二間公司，我休息了大概兩年，要自己去建立返好多嘢。」
估衛詩比自己快嫁人
二○一五年，Janice約滿A Music後，期間一直與不同唱片公司接洽，當時坊間盛傳，她要求唱片公司必須同時簽約妹妹衛詩，傳聞真假已不重要，這對twins的確是姊妹情深，至今仍一起居住，「可能因為我係家姊，覺得要照顧屋企人，由細到大都係咁，但我都見到佢長大了，佢自己識得照顧自己，所以我都唔擔心佢，不過我諗我哋都會繼續一齊住，一係佢結婚搬走，或者我結婚佢搬走，有時我覺得我哋分開唔到。」
Jancie笑言，妹妹應該比她快嫁人，今年情人節，她仍然是單身？「單身呀！但係都開心，都有人追嘅，我亦都唔會抗拒，只係未遇到一個合適對象，等待囉，我都單身咗十三年，係咪受過好大打擊？上一次都係，唔知呀，好似對方突然之間變咗心，跟住好唔開心，雖然只係一年時間，但一年對我來講好耐㗎喇，好多人問我想唔想結婚？我都有諗過，但係呢一刻，好似唔係特別想，妹妹應該比較快（結婚），哈哈！」
二○○九年妹妹在日本「出事」，傳媒鋪天蓋地報道事件，當年狗仔隊更二十四小時貼身追訪，Janice第一次面對人生衝擊，幸好信仰陪伴她度過了這個難關，她說︰「大約二○一○年，我找到自己的信仰，亦都因為妹妹發生嗰件事啦，整個生活和人生都轉變，當時第一個感覺係震怒，完全估唔到，但睇返轉頭，係最大嘅打擊，亦都係最大嘅祝福，覺得好感恩，因為呢件事，我兩個都遇到信仰，然後去轉變，扭轉了大家生命，令到我哋更加多喜樂平安！以前我哋成日都鬧交，對大家都冇乜耐性、冇尊重、冇understanding，會比較對方，依家冇喇，好明白好了解對方，然後去識得欣賞、識得包容。」
Janice笑言，入行後有一段時間十分迷信，「我細個已經好spiritual（心靈）探索唔同類型宗教，以前有信過風水，每個月一次會請風水師傅嚟屋企睇，但嗰陣時我成日都病，有一日掉晒所有嘢，結果嗰晚就好返好多。」
參加《聲生》幾攰都值得
人生總是計劃趕不上變化，小時候的Janice沒有想過會當歌手，讀書時，她填寫「我的志願」是新聞主播，「唔知點解細個爹哋讀報紙，跟住我就會扮喺電視播新聞，估都估唔到自己一唱就唱咗二十年，如果依家唔係唱歌會做乜？我覺得可能都係音樂方面嘅工作，或者Art Gallery、Art Magazine，總之都應該係creative方面。」
離開華納後，Janice沒有再簽約唱片公司，決定自組公司做獨立歌手，她坦言是跳出comfort zone，「點呢？自己做呀？我唔識㗎喎！I don’t know anything about business，又要經歷一次呢個過渡期，又要再適應，我覺得對我嚟講，做呢件事要好有勇氣，因為一出道就慣咗嗰個模式，俾大家照顧、俾大家決定晒，依家就係自己要諗囉，不過開始慣、開始適應喇，to be honest，踏出呢一步，我覺得返唔到轉頭！做獨立歌手，Yeah！getting there！」
Janice另一個新挑戰，是首次參與內地綜藝節目《聲生不息-大灣區季》，這次亦令她眼界大開，「嘩，拍攝時間好長，好多訪問要講好多嘢，自己好似變咗一個新人咁，係好大挑戰，但我覺得係開心，睇第一季嘅時候，我已經覺得舞台好正，特別係編曲和製作，大家都好細心去做，一路都好希望可以有呢個機會，其實未知道會被邀請之前，自己都已經有上國語課，直到去錄影第一日，我覺得好似一個夢咁，佢哋用心去做每一樣嘢嘅程度，令大家覺得就算幾攰都值得，依家都差唔多拍完，仲差一集，時間過得好快，好唔捨得，同埋好開心今次，同一班歌手朋友好似建立咗一個關係，大家一齊去做一件事，每個禮拜都好期待再見到佢哋，好似薛凱琪、祖兒呀，呢個節目，令到我好似重新愛上廣東歌。」Janice更即場預告，為了二十周年特別造了一首新歌，「好快就聽到，係廣東歌呀！」高高低低二十年後，期待另一個新開始。
封面攝影：Kris Yeung
協力︰Gwen
花絮攝影︰洪志富
形象︰Winnie Hu
協力︰Haley Chau
髮型︰Domanic Tao@Orient 4
化妝︰hongjai_makeup
服飾︰Isabel Marant、Issey Miyake、Maje、Messika、Saint Laurent、Sandro
