現年37歲的盧頌恩（妹頭）自2009年入行，今年踏入第15個年頭。由當年𡃁模出身，到今日成為HOY TV人氣綜藝節目《臥底旅行團》主持之一，更憑節目創下逾6點收視，成為名副其實的「有線一姐」。她早前接受商業電台《星光背後》專訪，大談入行經過、事業轉折與近年身形變化的原因，展現樂觀與知足的性格。
妹頭憶述自己七歲喪父，自小與母親及家姐相依為命。中學時她夢想報考演藝學院，卻遭母親反對而轉修理工科。大學時期因朋友介紹，開始當龍友模特兒：「嗰陣興『影會』，好多攝影師打晒燈影女仔，我擺唔到性感甫士，只係扮可愛。」
沒想到這些照片令她被Jam Cast公司發掘，簽為旗下模特兒，更因此獲安排參演商台與TVB合製的節目《十人巷》，正式展開幕前生涯。之後她相繼於亞視講馬節目及有線主持足球節目，成為體育與綜藝節目雙棲主持。妹頭坦言初入行做freelance主持時收入可觀：「最高峰試過月入六位數，忙到冇得瞓覺都覺得值得。」
拍完《臥底旅行團》第二輯後，妹頭正式簽約有線電視。2019年節目轉戰免費頻道HOY TV播出後，與拍檔李尚正（阿正）組成的搞笑組合人氣急升，節目成為台內皇牌。
對於被封「有線一姐」，妹頭笑言從未想過跳槽：「一來冇人邀請，二來我都冇諗過。其他電視台唔缺我呢啲人，我喺呢度做得好舒服，公司又有感情，無動機要走。」
節目中阿正經常以寸嘴取笑妹頭，兩人互動成節目亮點。妹頭笑言：「阿正窒我就梗嘅，佢咁得意搞笑，嬲唔落佢。佢笑人好高境界，唔會令人嬲。佢話我肥，我真係肥吖！我天生下把，冇問題。」
近年妹頭身形明顯變化，她坦承與創業有關：「開足浴店嗰陣壓力大到瞓前都諗鋪頭啲濕碎嘢，連揀邊隻廁紙都煩。無得釋懷，只能適應。身形多咗人談論都係好事，公司完全唔介意，好正！」
感情方面，妹頭早已有個拍拖超過十年的圈外男友。她笑言已過了恨嫁年紀：「細個會諗結婚生BB，而家覺得唔生都OK。媽咪唔再催，我家姐又結咗婚生咗。我哋舒服開心最緊要，結唔結婚冇乜所謂。」
