「火力全HOY」十月全新節目排陣發布會昨日（20日）舉行，何爵天、李尚正、盧頌恩、伍詠薇、李凱賢、向海嵐、江嘉敏、方健儀、占士丁丁等出席。日前有報道指由黎諾懿、李佳芯主演的劇集《義和》原本安排播出，但突然被抽起，周大福媒體娛樂行政總裁兼執行董事黃雅芬表示已安排日劇取代。黃雅芬回應指是應片商要求抽起，「我哋對劇集都好大期望，好早已經買咗，大家見預告都播咗，我哋都失望。」至於未能播出的原因，她說：「可能好似網民所講，片商受到一啲壓力，所以唔俾我哋播，（你有無向片商了解點解唔可以播？）片商唔可以同我哋講嘅，咁我哋都無辦法啦。」她承認在金錢上有損失，「我哋都唔想呢件事發生，但我哋簽約時，真係佢哋隨時可以有機會攞走套劇，下次我哋簽約會小心啲啦。」再被問到有否覺得是友台向片商施加壓力？她說：「我哋覺得片商一定係受到壓力，不過，係啲咩壓力，我諗你哋大家都估到啦，都唔使我親自答啦，哈哈！」
另外，處境劇《你的保安李寶安》落實在晚上8點播出，與TVB《愛．回家之三代同糖》正面對決，被問到是否因為節目被抽，所以「還拖」？黃雅芬指是順應民意，「我哋被人抽起咗套劇，係令到大家失望嘅，所以都希望做返啲嘢令到大家開心，民意都係話8點鐘一齊睇，好開心！」她強調：「我哋其實係開拖，唔係還拖嘅，希望大家幫拖啦！」
劇集《義和》由馬來西亞Astro旗下Astro Originals於2025年製作，去年底在當地已經播出，對於HOY被抽播一事，網上眾說紛紜，但大多矛頭都指向TVB，猜測因為黎諾懿為旗下藝人而對片商施加壓力。在HOY舉行記者會後，YouTuber「飛天爺爺」在節目內亦有談及此事，「真相係好簡單，《義和》由第一日開拍己經簽晒合約，喺香港係唔會有播映權，呢個係TVB同Astro一早簽訂嘅合同。」他指這是TVB與Astro的協議，所以才會讓黎諾懿接拍，他強調任何電視台都可以購買此劇，只是不能在香港播放，亦認為Astro不會受到任何壓力，因為一切依照合約進行，「如果HOY TV真係無辜嘅，你掟份合約出嚟，就知片商亦唔可以講原因？定抑或係HOY TV唔可以講原因嘞，我自己呢就企係合約個一方嘅。」
更多現場圖輯：
