「致敬詞聖盧國沾作品演唱會」昨晚（7日）於紅館舉行，一眾表演嘉賓包括葉振棠、徐小明、羅嘉良、呂珊、李龍基、張德蘭、米雪、溫兆倫、雷安娜、蔣志光、麥潔文、黃寶欣、羅敏莊、張與辰和劉洋聯同由麥家樂担任指揮的寰宇交響樂團，以沾Sir的經典金曲向他致敬。
張德蘭以一曲《相識也是緣份》，為演唱會揭開序幕，她之後說：「首先我要多謝大家嚟支持今晚演唱會，其實盧國沾先生真係寫咗好多令大家刻骨銘心嘅金曲，對我哋香港樂壇有好大嘅貢獻，盧國沾先生嘅作品係我哋香港好寶貴嘅文化遺產，你哋話係唔係？所以我喺度希望大家用你哋最熱烈嘅掌聲送畀盧國沾先生，好嘛？」此時，全場掌聲雷動，她續說：「我睇過盧生佢生前出嘅一本書，叫做《歌詞的背後》，我睇晒成本書，我發覺盧生原來好鍾意大自然，所以如果你有留意盧生嘅歌詞，你會發覺佢係會有好多對大自然嘅描寫，更加有好多佢嘅人生哲理喺裏面，咁我知道佢今晚佢嘅囡囡喺度，盧太亦都喺後台聽我哋唱歌，我想借呢個機會除咗多謝盧生，亦都要多謝盧太，因為佢一直都畀好多支持同埋佢好愛盧生，我同佢哋真係相識咗好耐，咁呢個時候我唔阻大家咁多時間，我喺度送畀大家一首我好鍾意嘅歌，大家可以細味裏面嘅歌詞，呢首歌我比較少唱，但我今晚好想用心將佢唱畀大家聽，呢首歌就係《情若無花不結果》。」在唱畢此曲後，她再說：「真係好掛住佢，跟住我唱嘅歌可以話改變咗我嘅歌唱事業，因為呢首歌係盧生第一首寫畀我嘅電視劇插曲，《鮮花滿月樓》。」
接着的李龍基獻唱了《陸小鳳》和《浣花洗劍錄》；呂珊先唱出《每當變幻時》，然後說：「好多謝主辦單位邀請我嚟演繹沾Sir嘅歌，其實佢咁多首唔同類型嘅歌曲，喺我哋嘅成長過程都代表唔同嘅片段，佢嘅歌太精彩，隻隻歌我都想唱，大家平時應該好少見到我着晚裝，今晚可以同咁好嘅樂團一齊合作，跟住送畀大家嘅呢首歌都係由細唱到大，呢首就係《神鳳》。」
葉振棠出場先唱出《大內群英》，再說：「多謝大家對盧Sir嘅支持，其實我自己當年好幸運，因為我加入麗的電視之後就一口氣可以唱咗六套劇嘅主題曲同插曲，呢啲主題曲同插曲都係盧Sir嘅作品，大家仲記唔記得《大內群英》、《浮生六劫》、《浴血太平山》、《大俠霍元甲》同埋《太極張三丰》嘅主題曲，仲有《浮生六劫》嘅插曲《戲劇人生》、《浴血太平山》嘅插曲《找不着藉口》、《大俠霍元甲》嘅插曲《誰知我心》，我非常非常多謝盧Sir對我嘅愛戴，但係大會同我講雖然我自己有咁多首盧Sir嘅靚歌，但我只可以揀兩首，不過我要唱三首，我問點解呢？佢哋話我要代表Michael Kwan向盧Sir致敬，各位朋友《天蠶變》。」久違的黃寶欣獻唱了《驟雨中的陽光》和她當年參加第四屆新秀歌唱比賽時的作品《我為你狂》。
羅嘉良唱出《秦始皇》，之後說：「盧國沾先生寫咗咁多膾炙人口嘅歌曲，令到我哋留下咗咁多美好嘅回憶，我喺1984年參加新秀歌唱比賽嗰陣認識盧生，當時佢第一次見到我，我亦都係第一次見到佢，眨吓眼已經41年，我非常多謝我嘅恩人盧國沾先生，因為如果冇佢就唔會有我羅嘉良，我相信大家都會永遠懷念盧生，我好開心成為佢嘅徒弟，跟住我要送畀大家盧生一首非常出名嘅歌曲，亦都係一首電視劇嘅主題曲，大家頭先開場嘅時候呢首歌就已經響起，送俾大家，《殘夢》。」接着，雷安娜先後唱出《明日話今天》和《願君真愛不相欺》，她更找來蔣志光和她合唱《人在旅途灑淚時》，之後蔣志光再唱了《漁舟唱晚》及《大地恩情》。
《中年好聲音3》的張與辰先出場唱《決戰前夕》，劉洋緊接出場唱出《雪中情》，之後兩人合唱《傲骨》。壓軸出場的溫兆倫先唱出《隨緣》，之後說：「我重新一次介紹自己，大家好，香港嘅朋友好耐冇見，我係溫兆倫，好榮幸可以嚟到今晚紅館呢個舞台，我哋可以一齊向盧國沾先生致敬嘅同時，我哋唔可以忘記一件事，一個成功男人嘅背後一定有一個好好嘅女人支持佢，同唔同意呀？所以大家要對老婆好啲，今晚我哋嘅掌聲除咗係送畀盧國沾先生，我哋更應該用更熱烈嘅掌聲鼓勵同埋送畀盧國沾夫人，盧太，多謝你同沾叔睇住我入行，我都好幸運喺拍劇嘅期間遇到好多好嘅劇本，其中有一部劇我相信大家都有睇過，叫做《今生無悔》，跟住落嚟送畀大家同名嘅歌。」他在唱畢《今生無悔》後，便聯同其他歌手大合唱《前程錦繡》，為演唱會畫上了圓滿句號。
羅嘉良與溫兆倫在演出後接受訪問，原來兩人有鮮為人知的緣分，除了近年同是在北京生活，更不約而同地租住鄰近小區成為鄰居，而且各自的女兒更曾入讀同一學校。兩人曾合作拍攝的電視劇《流金歲月》，問到有否興趣再合作拍劇時，羅嘉良表示不排除任何可能性，但要視乎劇本是否吸引，溫兆倫補充道：「其實有分別搵過我哋，但檔期夾唔到囉。依家我睇羅嘉良咋，佢ok我ok！」
《中3》的張雨辰與劉洋首次踏上紅館舞台，張雨辰形容感覺興奮，「本來以為自己唔緊張，點知唱完講嘢就開始手震。」劉洋透露為唱好歌曲《雪中情》，不停苦練，又背廣東話發音一星期，他承認自己有點緊張，「張雨辰有提醒我舞台升高時不要靠得太後，擔心我會踩空！」他目前已開始學廣東話，又大呻難度高，「唯有多練、多聽及多講，覺得難點在於廣東話的俚語，新聞報道的用詞我就明白，但我相信日後多練就好。」張雨辰則期待日後有機會於紅館舉行個唱。
