由郭晉安、馬國明、唐詩詠、張曦雯、陳豪主演的《白色強人II》，昨晚一集亮點絕對是三大視帝郭晉安、馬國明及陳豪的疊聲嗌交戲。
首先是YT與唐明對質，然後Vincent及阿Yan（張曦雯Kelly飾）嘗試介入做和事老，但YT依然堅持指唐明有問題，唐明亦表示心灰意冷，之後YT一句：「你叫我點信你呀」後，唐明、Vincent及YT正式開火。雖然該段嗌交戲只有短短八秒，但由於三人疊晒聲鬧交，再配以劇組刻意安排的長鏡頭，整段嗌交戲相當有張力，最後YT爆Seed一句：「我係委員會召集人呀，我要踢邊個走咪邊個走咯！」為罵戰劃上句號，之後長達五秒的Dead Air更令氣氛凝重。
談及嗌交戲，導演Patrick表示對三大視帝讚不絕口：「事前安仔、馬明都好好，佢哋俾咗好多意見我、睇吓點樣昇華呢場戲。其實嘥最多時間係喺排戲上，佢哋三個都排咗有成一個鐘。因為大家一人一句，又完全唔需要理會其他人講咩、只理會自己，所以要夾到一個大家都舒服嘅位，同埋點樣再有氣氛啲。好多謝馬明、阿Mo（陳豪）、安仔同Kelly咁用心。」
三位視帝對這場嗌交戲都落足心機，網民對於該段戲亦正評不斷，更笑言TVB今次玩創新以「三人疊聲」形式向電影《寒戰》經典場面致敬外，更指該場戲百看不厭：「白色強人好強」、「演技超好，重看也好好看」。
