相隔11年，王菀之（Ivana）昨晚（22日）再登紅館，為了紀念入行20周年舉行《合體 – 王菀之演唱會2025》，與張敬軒「合體」辦了一個精彩絕倫、震憾感動的演唱會。多位圈中朋友，包括劉德華，炎明熙、謝安琪、張繼聰、GIN LEE、白只、阿卵、梁仲恆、梁祖堯以及湯駿業等等，均有到場支持。演唱會一開始樂迷便站起，Ivana一口氣演唱11首歌，令全場無一不陶醉於她的音樂世界之中。當中包括有自彈自唱，又單獨跳了現代舞，無論唱功，每首歌的編曲，音樂編排都引爆熱烈掌聲及歡呼聲。
隨後，Ivana跟觀眾打招呼，全場狂歡呼拍手不停，大叫「好靚呀你！」、「好瘦」、「好正」，Ivana突然說：「我飲水濁親，養生咁耐竟然係飲水濁親….唔凍唔熱係容易濁親，唔係40歲以上先係咁⋯⋯」可愛行為逗得觀眾狂笑不止，「多謝大家來到合體演唱會！又到咗我全晚最驚嘅環節啦，就係講嘢。」對於觀眾大叫「好瘦」，Ivana回應：「你打俾我教練啦，佢辛苦過我，佢train我之後，佢瘦咗。」Ivana然後舉起V字手勢，笑道：「其實我想V，但係咁啱又係2，20年啦！我相信係紅館開個唱嘅唱作歌手唔係好多，而女性唱作人就可能更少。大家唔好誤會，我唔係讚自己，我唔係讚自己，我唔係讚自己⋯⋯」
Ivana繼續道： 「我想話，冇你地每一個支持，我又點能開到紅館演唱會呢？你哋嘅支持係令我最感動係，我代表我哋成個精英雲集嘅團隊，多謝大家。我哋成個團隊都係有夢想嘅人，為夢想努力奮鬥。多謝大家揀咗人生寶貴嘅3小時，係呢度同我哋一齊合體，我係呢度祝福大家，全年大吉行好運，你哋睇我緊張到隻手係咁黏著條裙…係時侯唱一首，好早好早嘅歌送俾大家。」Ivana繼而唱出成名作《我真的受傷了》。
第三部份，台面出現兩張對坐椅子，Ivana表示：「以下環節，我都唔想多講啦」然後觀眾已經瘋狂歡呼，「係好特別，呢首歌送俾現場每一位，送俾我自己，亦送埋俾佢。」繼而靈魂伴侶張敬軒升台，兩人默不作聲，又不敢對視，到《下次愛你》音樂響起，Ivana已經忍不到開始哭，軒仔也跟著缺堤。兩人卻為大家帶來驚天地泣鬼神喊住的合唱版《下次愛你》，令不少觀眾都被感動得熱淚盈眶。兩人唱畢互相擁抱，軒仔而親吻Ivana一下才離開。
是次演唱會，Ivana並無準備安歌，亦於完結時，跟觀眾表明沒有安歌，但最後一首歌《小俠》結束後，觀眾已不停狂叫，完場後亦不肯離開，狂叫安歌近五分鐘，最後Ivana一個人走出來，手握電話說：「多謝你地，我有少少驚，我冇預 encore 嘅…好多謝你哋咁熱烈同鼓勵我出返嚟， 我點解帶電話，一係你哋話我聽你想聽咩，我驚我唔記得歌詞，我成日覺得encore要係真嘅，如果冇人嗌就唔好出嚟，所以冇預就冇準備定啦。最後Ivana自彈自唱半首 《面具》 ，「《面具》！但二十年冇唱，對上個次唱係出道嗰陣，我真係心少少緊張，上網搵歌詞先，如果有少少甩漏，都希望你哋接收呢份禮物 。」
