有傳MC張天賦今年8月將再踏紅館，上周六（21日）他於澳門舉行《天賦之聲》音樂會，透露今年有不少大project！
2024年除夕，MC在澳門除夕演唱會上，曾經許下承諾將在2025年健身成功，並練出腹肌，可惜到2026年還未兌現，今次再到澳門開騷，MC明顯清減不少，他在台上坦言現在隔日便做gym，5月的《拉闊》大家必定有驚喜！
只此一場的《天賦之聲》音樂會，在沒有宣傳的情況下，票房幾乎秒殺，今次MC大玩自選歌單，除了一系列他的大熱作品《反對無效》、《乖乖報道》、《死亡之吻》、《救命稻草》、《時間不早》和《記憶綿》等，他還自爆「天賦失戀時會聽的歌」系列，竟然是梁漢文的《七友》和關楚耀的《死亡之吻》。
明顯清減了不少的MC，一上台就問觀眾「係咪減咗？」，台下一班「賦二代」當然贊同，MC說︰「即係呢，今年會有好多大project啦，我哋會出新歌啦，又會有新碟啦，可能遲啲會有啲演唱會啦，所以呢排我係好努力嘅！因為前年我就喺呢度一個演唱會上，答應咗大家話可以喺上年演唱會除衫，其實我之後都好後悔㗎，其實呢，當時情況爭少少就倒數，導演就話唔夠時間啦，你講啲嘢拖延下，就係咁講咗呢個承諾，咁就大鑊喇！依家我嘅schedule，公司幫我安排咗每隔一日要去gym報到，係呀，真係好辛苦㗎，依家每隔一日要去跑步，跑完步就要操嘢，暫時好彩，我未進入要節食環節！」
台下一班「賦二代」馬上大叫「除衫」，MC說：「今日係唱歌嘅，遲啲，透露多少少啦，之後嗰個演唱會入面呢，嘩！因為我哋已經開咗會，傾咗啲details，雖然依家未有嗰個body，但我哋傾完之後，亦同服裝師講咗，幫我整一啲少啲布嘅衫，到時我就會咁樣咁樣咁樣，好大隻㗎喇！」
雖然MC未有透露是哪個演唱會，不過估計是5月舉行的《<3少於三 MC張天賦 x CONSTANCE x Gareth.T 拉闊音樂會》，各位「賦二代」又要搶飛啦！
圖片來源︰giftedmc1201