汪明荃在澳門舉行《阿姐Diva汪明荃演唱會2025》，以《閃爍登場》及《迷人Pink Lady》揭開序幕，阿姐表示好喜歡海報的logo，「由左至右讀就係英文嘅DIVA，但係你當睇中文又得喎，係寫住『阿姐』，其實咩稱呼都係一句啫，無論係DIVA又好，阿姐又好，汪明荃仍然係汪明荃係Liza，我都係將最好嘅一面送俾觀眾。」
羅家英擔任嘉賓，他表示每逢 4 月1日，都會好掛念一個朋友——張國榮，「我同佢一齊做過好多套戲，包括《金玉滿堂》同《色情男女》等等，同時佢對粵劇都好有興趣，得閒個陣佢成日問我啲做手係點，轉個身睇下，揈個水袖睇下，哥哥經常同我傾呢啲偈，所以我哋好多嘢講，喺呢個時間我送呢首歌比大家《儂本多情》。」
阿姐感謝音樂總監趙增熹，「佢成日同我練歌，喺呢度我亦要多謝樂隊、和音、中樂老師，多謝晒，最重要係多謝大家對我嘅支持，因為我唔知仲可以唱幾多次？所以非常感激每一次演唱會入場嘅觀眾，多謝你哋支持咗我58年，聽返呢啲歌我自己都非常感動，因為呢啲歌可以唱咗幾十年，同埋而家嘅觀眾都係咁擁護我，多謝大家支持。」
安歌環節，阿姐獻唱《熱咖啡》後說：「我今日係歌手，聽日可以係粵劇嘅演員，我亦都有去做一啲行政嘅工作，為業界做貢獻，每一個崗位我都盡心盡力去做，因為我知道大家對汪明荃係有好高嘅期望，有好多要求，所以我係要不斷改進同增值，係呢度要多謝你哋嘅支持，陪我一齊行呢條娛樂之路，同大家分享《美麗娛樂世界》。」在唱畢演唱會主題曲《Make My Day》後，阿姐與家英哥合唱《萬水千山總是情》為演唱會劃上句號。
更多現場圖輯：
