武術指導的林迪安近日進駐小紅書，他發的第一條片，就是自爆電影《無間道》「傻強」，本來是他演的。林迪安當時正是他以武指身份拍《Exit Wounds》（以毒攻毒）後回港，導演劉偉強就找他演「傻強」和做武指，他還記得自拍港產片以來，未試過看完一整個劇本才放手，但這劇本很好看令他追着看，因而知道「傻強」這個角色，誰演就誰火，這角色一定爆紅。
林迪安自言喜歡做幕後的滿足感：「我亦都有少少自知之明，如果我做演員，你行得幾遠？應該都唔會行得好耐。」他隨即致電劉偉強推辭演「傻強」，他指《古惑仔》第一集，他就是原裝正版的「傻強」，所以劉偉強就想把傻強寫給他演，「跟住我話唔得，『傻強』呢個角色一定要俾返一個演員做。」於是他推薦杜汶澤給導演，並謂：「邊個做邊個紅，我唔係唔想紅，但我驚我自己，我紅咗嘞，兩三年演員生涯之後就冇啦喎，我冇指導做，可能斷層。」
最終林迪安在片中飾演「迪比亞路」，並與「傻強」有對手戲，當中「傻強」的經典對白：「如果一個人在做一件事情的時候很不專心的看着另外一個人，他就是警察」，就是對着「迪比亞路」說。林迪安表示這些年後多人都問他後不後悔？他說：「我真係冇後悔過，因為我知道一樣嘢，你想得到一啲，就要失去一啲，我放棄咗做『傻強』嘅機會，但我保住咗自己最喜歡的幕後事業。」林迪安覺得現在也不俗，做自己喜歡的事，又拍了《蜘蛛俠2》等十部八部荷李活電影，經歷了很多，自覺已不枉此生。
最後他總結：「有時你以為讓出去嘅係機會，其實可能你為更大嘅嘢留出空間。聰明係能力，但捨得係智慧，我成日同人講，做呢行咁多年，我學到最大嘅嘢就係，你唔可能咩都想要，你想要幕後嘅長久，就要捨得台前嘅風光。你話我傻又好，精又好，但我依家65歲仲有工開，仲喺片場做緊自己鍾意嘅嘢，我覺得呢個就係答案。」
