殿堂級樂隊太極樂隊於2026年5月2日假香港啟德體藝館，舉行《太極樂隊40周年巡迴演唱會—香港站》，與樂迷回顧40年來的音樂歷程。太極五子盛旦華（蛇仔）、鄧健明（Joey）、雷有輝（Patrick）、劉賢德（Ernest）和朱翰博（Ricky），以一曲《迷途》為演唱會揭開序幕。
Patrick在台上表示：「之前我哋喺訪問度都提過，今次演唱會會唱多啲現場少唱啲嘅歌。」演唱了《理想都》及《他》等歌曲後，蛇仔一如訪問中承諾，演繹了鮮有公開演唱的《瘋人物語》。Joey補充說：「今次演唱會唱嘅歌，現場演唱係少過3次嘅。」之後他們唱出《消失的愛》和《不羈》。Ernest除了獨唱《So Lonely》，再與Joey合唱《還有我》，最後連鼓手Ricky也演繹了《我和太極一起走過的日子》。
在紀念數年前離世隊友唐奕聰（Gary）的環節，太極五子除了邀請鍾達茵（Pam）演繹Gary作曲的《痛》外，還演唱了《For U And I》。當演繹《一生不再說別離》時，現場播出Gary的片段，五子邀請過萬觀眾一起亮起電話燈，全場瞬間變成一片星海，藉此送給遙遠的隊友Gary，場面十分感人。太極五子演唱了以往演唱會主題曲《乾杯》、《曙光》和《一世回味》後，接着首次現場演繹為今次演唱會創作的新歌《回憶殺》及《When you need a friend》。五子又開心透露，獲兒時偶像「歌神」許冠傑送上親自創作的歌曲《我願長伴您》作為賀禮，祝賀他們出道40周年，許冠傑還拍下祝福片段，收到這份大禮令五子感到非常榮幸又開心。最後他們以《每一句說話》一曲為演唱會第一部分作結。
Encore部份開始，現場突然播出太極樂隊首個MV《紅色跑車》，之後MV女主角吳君如驚喜現身，笑說：「太極40周年演唱會，《紅色跑車》點會唔預我呀？！」君如表示開心終於有機會可以澄清：「MV入面嗰個唔係我嚟，係AI嚟，key我落去，40年前嘅MV喎，我點會喺度呀？我出道冇幾耐㗎咋，我前兩年仲同個小鮮肉拍咗套《我談的那場戀愛》，我啱啱出道之嘛！點會拍到個40年前嘅MV。」見君如扮年輕扮得開心，五子再出場時Patrick即稱呼她為「小妹妹」。
君如笑言已經40年沒有見過五子：「真係想喊，我可唔可以逐個攬攬同錫錫先。」但當她攬蛇仔時突然大叫：「佢乜嘢拮到我呀？！」原來是結他，場面極之搞笑。君如又指其實Ernest曾經是鄰居，又大讚Joey是「結他神」，還抵死地問Ricky：「鼓手好少聽到佢哋講嘢，講親就好爆，今晚有冇新嘢爆。」君如更大讚五子保養得宜：「係咪食咗超級防腐劑？！」
君如接着表示要跟Patrick算一筆舊帳：「我拍MV食完煙之後，被安排演嘅都係啲小三同妓女，我嗰時得19歲咋，你點賠返畀我？！」之後君如再投訴：「佢好鬼衰，我一去到現場就見到Patrick對眼望住我，佢應該係諗『做咩電視台派條咁嘅女畀我』，我知你諗緊乜㗎，你諗最好有邱淑貞、吳家麗、朱茵、劉嘉玲、或者係李……你講得李麗珍啦！」Patrick隨即澄清：「其實我品味比較高，我好想搵返『程大嫂』㗎！」君如反駁：「嗰時都未有『程大嫂』，你唔好亂咁嚟啦，但畀你有得揀，你係咪都係會揀返我？」Patrick肯定地點頭說：「梗係，又有『程大嫂』又有『洪興十三妹』乜都齊！」君如再說：「我想講嗰時我未夠紅，你哋又未夠紅，所以係冇得揀，但人生好多嘢係冇得揀，但喺冇得揀嘅情況之下都成為經典，就係呢首《紅色跑車》。」
君如與五子合唱《紅色跑車》時，跟Patrick大玩吹泡泡，兩人變身大細路，場面搞笑。唱完歌後五子要求「集郵」，與君如及全場觀眾拍攝大合照。君如臨離場前再發揮搞笑本色，問五子：「好想問點解你哋幾個後生仔打band會叫做太極？」隊長蛇仔解釋，當年想過很多名字，最終選了太極：「太極嘅意義係天時地利人和，人和好緊要嘛！」君如即回應：「但係我好想同大家講，你哋呢個年紀，就最啱叫太極啦！哈哈！希望60周年時可以再call我，我哋一齊努力呀！」
太極五子接著演唱40年前參加歌唱比賽的《暴風紅唇》，再唱出經典歌曲《Crystal》及《緣》。到最後演唱《留住我吧》時，Patrick嫌台下觀眾太乖，要求大家站起來：「唔好理咁多出嚟玩，咁先似band show。」全場大合唱氣氛高漲，Patrick感動地說：「多謝大家嘅生日禮物。」之後五子再與全場觀眾大合照後便離開，但觀眾不肯離場，最終需要二度Encore。五子先演唱《頂天立地》，最後再要求觀眾大合唱《留住我吧》送給他們，Patrick說：「你哋唱得好好，可唔可以唱多次，好想享受你哋唱，代替生日歌。」全場齊聲高唱，為演唱會劃上完美句號。
