王君馨（Gace）自2021年離巢無綫後轉型，積極拍片更新社交媒體，又以獨立歌手「G. Racie」名義重新出道，並於去年5月宣布順利誕下女兒Audrey。事業家庭兩得意，今年她為了送一份母親節禮物給自己，與教會姊妹報名參加了室內健身賽HYROX香港站，希望可以自我挑戰。小B女今個月踏入一歲，Grace多得圈外老公神隊友，在家經常擔任遊戲大使，令她輕鬆不少。
近年全球大熱的室內健身賽HYROX，上周的香港站一連三日比賽，吸引近兩萬人參與，其中不少藝人都紛紛一展技能。其中已為人母的Grace亦勇於挑戰，她說：「其實今年一月，教會好多弟兄姊妹都諗住參加，一開始我冇諗過參與，因為剛生完BB六個月左右，但之後牧師的老婆就信息我，問我想唔想join？因為比賽時間在母親節，對我來說當俾自己一個好好的母親節禮物，我聽完又覺得都幾啱，因為近排都真係冇動力去運動，每日湊BB已經好攰，但因為是母親節，當俾自己一個好好禮物，我就答應了，與教會兩位姊妹及牧師太太，四個人一齊去玩。」
她說跑步比跳舞更辛苦，「第一次接觸這項運動的時候，因為我本身跑步好差，覺得是很悶及難受的運動，平時跳一小時舞都冇問題，但你叫我跑十分鐘，我已經覺得人生好難受，所以一開始覺得跑步好辛苦，但因為比賽中有八個訓練，我哋四個女人第一次試完，教練跟我們分析邊個做邊兩項，但我又推唔郁嚿鐵，但牧師太太好似去咗超市推車仔一樣，一推就推到，令我發覺有些人的身形肌肉擺位是不一樣，可能手臂好強壯，推嘢好叻，但當訓練過後，第二次去我又推得郁，所以就覺得原來是肌肉已經適應了這項運動，我就識得如何去用力，令整件事變得更容易，已沒有想像中的做不到，只要俾你的肌肉去感受及好好鍛鍊，都可以做得到。」
明白團結的力量相當大，肯踏出第一步已成功一半，「我發覺當我們沒有動力的時候，而我哋同一班人去做一件事，可能本身做不到的事，只要鼓勵對方一起去探索，就會發覺沒有事是做不到的！可能一個人會覺得有些難，試幾次先至做得到，但當你一班人的時候，那份力量強大好多，所不要經常覺得甚麼都做不到，其實只要我們願意踏出第一步，大家方向一致就可以解決得到。我諗HYROX最好玩就是這樣，不用自己獨自去面對完成！」
由HYROX開始，令她知道做運動要有動力的重要性，「前排出席很多活動，整傷了腳腕，以及拉傷腰及肩膀頭，頸又不太郁到，之後去睇物理治療及針炙，我發覺身體真係需要不停去做運動，如果一開始就操得太勁，會容易受傷，所以有時候不夠時間出去做運動，都可以在家花三分鐘至五分鐘拉筋，令整個人的肌肉狀態比較好，我覺得乜都係由少少開始，因為如果真係冇動力去做運動，可以搵到三個女仔或者三個男仔，男女都可以一齊玩，令到自己有動力去做少少運動，你鍾意乜嘢，你就去做囉！」
與任職銀行家的老公Daniel結婚九年，Grace去年5月更誕下囡囡，已為人母的她，今年第一次過母親節，雖然B女仍未懂得有任何表示，但一個眼神及一個動作，已令她甜在心，「我覺得湊BB體力上真係好攰，特別手腕、手臂及腰，因為BB差唔多20磅，你日日捧住一個會郁來郁去的20磅，其實好唔容易，但有時候望住她，她又對你笑，佢嘅眼神對呢個世界充滿好奇心，看到甚麼都好似好開心，我發覺小朋友係more than你同佢講，佢應該做咩嘢，而係你要做俾佢睇，你要做一個好榜樣，不要講一套做一套，因為小朋友的吸收能力好強，現在我只會覺得，盡我能力帶佢多啲出去玩，因為BB係非常之聰明，吸收能力好快，所以要多啲陪佢，好感恩呢段時間唔使拍劇，因為我應該都離開唔到佢，可能要等佢一歲多，依家有啲唔捨得，日日望住佢成長係好開心嘅事。」
她說幸好有老公這個神隊友，擔任遊戲大使，「BB好鍾意同佢玩，如果我好攰，由老公哄BB瞓就比較難少少，因為BB好似一見到爸爸就好精神、好想玩，所以如果要瞓覺，就要靠我或工人姐姐。爸爸係遊戲大使，但爸爸好叻換尿片，幫沖涼、換衫、著襪仔、著鞋仔都好快手嘅爸爸，大家有唔同工作崗位。」
