區瑞強將於7月舉行兩場《Albert再重聚（私房）音樂會》，昨日（17日）與胞弟區瑞明出席記者會，Albert表示這次演出似朋友聚會，設有問答環節，歡迎觀眾隨便發問。Albert邀請兒子區昕進、區瑞明做嘉賓，妹妹區桂芬因抱恙，正在休養未能參與。Albert指這次並非是單純的家庭演唱會，「我希望將一啲欣賞我嘅朋友同埋粉絲，大家聚埋一齊，唔同一般嘅大型演唱會，裏面有啲特別安排，搵咗我屋企人，我細佬同我個仔參與，原因係畀到個親和感覺，希望大家以後加入呢個Group，係一家人嘅感覺。」
Albert表示雖然場地有1000多個座位，但他只售賣地面坐位門票，「樓上坐位門票我係完全唔賣飛，所以每場得返700個位左右，兩場加埋真係好少位。」為與觀眾更加親近，他還有特別方法，「我好想同觀眾近距離接觸，大家親近啲，我會安排喺觀眾席附近表演，雖然未必每個觀眾都可以握到手，但係每個都算係握手位。」
Albert在歌單方面，亦有特別安排，「以往好多粉絲都投訴，有好多sidetrack嘅歌，我嘅演唱會好多時都未必有唱到呢啲歌，今次就有機會唱返。」
