《羅啟豪 & 譚輝智雙聲演唱會 2026》於紅館舉行，一對主角以串燒歌《雙聲七分串》揭開序幕。Ramon唱完《別人的歌》後說：「大家有冇留意我後面嘅屏幕出現咗好多畫，嗰啲畫係我以前畫㗎，想大家借5秒俾我享受紅館嘅舞台，喺呢5秒前我就係唱住《別人的歌》，但喺呢5秒後我就可以唱自己嘅歌，送俾相信我同埋同我行到今日嘅每一位。」接著唱出他首支單曲《相信相信》，更走到觀眾席與歌迷握手。
然後到輝智登場獻唱個人單曲《娛初》，他說：「嘩，真係嚟到紅館，其實我由細到大嚟過紅館好多次，我諗都有50次，但係次次都係坐喺山頂位，好少坐喺前排。山頂嘅朋友，你哋好嗎？呢個係例牌嘅指定動作，我有好多疑問，以前嚟紅館就成日喪嗌，我諗啲歌手其實見唔見到我哋嘅呢？又或者聽唔聽到我哋講嘢嘅呢？不如證實一下，你哋嗌呀！」觀眾即時大叫輝智，「原來係聽到，不如大家大聲嗌，真係好有Feel呀，原來紅館係可以咁Crazy！」
Ramon與輝智合唱《天命最高》，音樂總監趙增熹亦是這首歌的作曲人，阿熹上台時望向兩位主角，「我其實都係歌唱比賽入行，我19歲幫我朋友參加比賽，我就入咗行，好可惜佢就入唔到，嗰陣時喺我生命裏面有個好重要嘅人，我同佢講入唔入行好，佢就同我講有幾多個顧嘉煇！佢意思就係話入行要求高唔容易㗎！如是者我就喺呢行做咗40年，雖然我做唔到顧嘉煇，但我都係趙增熹。」
輝智問Ramon：「其實你之前有冇諗過有一日可以企喺紅館呢個舞台？」Ramon：「真係冇，我哋兩個40歲先至入行做歌手，點會諗到今日會企喺呢度。」輝智坦言：「其實有少少我覺得變態嘅成份，我睇返我啲相，嗰陣時做緊啲乜嘢，嗰個樣係……」Ramon激動表示：「我以前又有鬍鬚又肥。」輝智續說：「我覺得點會諗到呢個舞台，我覺得好癲呀！我無憾啦！我想講其實夢想係有聲音，呢一把聲音一定係歲月沉澱咗先可以唱到出嚟。」Ramon表示：「我想將今晚呢一份感觸送畀不同年齡，但心中仍然有團火嘅人。」
在最後環節，Ramon分享：「我知道以後每次遇到挑戰同埋難題嘅時候，只要記得今晚嘅畫面就會畀到力量我，同埋要多謝鼓勵我同相信行到今日嘅你哋。」輝智說：「我其實好少講啲感性嘢，我個人比大家嘅感覺好似冇嚟正經，Hea Hea哋，我要為自己做少少平反，我唔係好叻講嘢，但我好珍惜所有嘅粉絲Faiters，每一次見到你哋，我都盡量去記得你哋每一個，都會盡量搵啲方法同你哋傾偈！其實我係冇乜Friend，個個都知我難搞，好難相處。」Ramon則表示：「你當唔當我係Friend先？」輝智直言：「我梗係當你係Friend，我都有自知之明，識到咁多人對我嘅人生真係形容唔到，其實我都好鍾意自己一個，當然係未認識我老婆之前，多謝你哋，我會珍惜你哋每一位。」