無綫劇《刑偵12》下周邁向結局周，第十九及第二十集劇情圍繞林保怡飾演的丁洛風、與7個人格之間的「鬥爭」。為了脫離被丁少芸（陳法蓉飾）及「暴力人格」林昱水（張松枝飾）的囚禁、奪回身體主導權，洛風需要盡快找出每個人格的解離原因並與之和解。另外，刑凱（張振朗飾）及芷菲（傅嘉莉飾）想盡辦法拯救迷失了的洛風，期間遇上少芸挑機，致使刑凱與洛風的不同人格上演了一場精彩刺激的「貨櫃人格大戰」！
連播兩集的貨櫃人格大戰不但節奏明快、動作場面精彩刺激、鮮艷顏色對比的美學構圖、還帶出了不一樣的視覺效果，獲網民封為劇集名場面。這場刑凱大戰洛風人格一幕，拍攝手法相當新穎緊湊，上一秒刑凱還與昱水你死我活，下一秒昱水搖身一變成為洛風，並極力阻止自己傷害刑凱。除了昱水、夏軻（姚宏遠飾）及丁少婷（陳若思飾）等亦輪流出場與刑凱激戰/激辯，場口每一秒都充滿反轉及令人透不過氣的壓逼感。
據知這場貨櫃人格大戰前後拍了足足兩、三天，拍攝期間正值夏天，加上為免影響收音，台前幕後需要在完全沒有開冷氣及密不透風的情況下、頂着30多度高溫，展開連串追逐及肉搏，還要應付多個情緒高漲場口，光是想像也知道有多辛苦。出名捱得的振朗，拍攝首天疑似出現中暑狀況，他直指拍攝現場「好似地獄」，「因為拍嗰陣要封晒所有入口之餘，仲要係冇冷氣、超級焗，加上係鐵皮屋，太陽一曬會好似焗爐咁愈嚟愈熱，而我嘅造型係長褲同長身厚軍褸，仲要全程跑嚟跑去、跑嚟跑去。我開頭都仲以為自己頂得順，因為都拍咗咁多年嘢，但拍咗兩個零鐘之後，我仲着住件褸、Feel到自己出咗好多汗、但我就覺得好凍，咁我就知道大鑊喇，我知自己唔對路，但因為仲有十幾個鐘要拍，但冇辦法要捱過去。」
振朗續指由於拍攝場地偏遠，來回原本的酒店需要四個多小時車程，為爭取時間休息，振朗第一次主動要求工作人員幫忙在附近訂酒店，讓自己之後有較好的狀態可以繼續開工，他一再感激巢導及劇組貼心安排，「好多謝巢導幫我Handle晒成件事，佢真係好體貼演員嘅心理同身理狀況；第二日劇組又好快咁作出調動，等演員休息期間可以出外面呼吸吓新鮮空氣。」巢導亦大讚振朗雖然拍攝第二、三天身體狀況明顯不太好、聲線都病至沙啞，但只要一開機便看不出任何異樣，大讚振朗專業。
在場口中體力消耗僅次振朗的，就是飾演昱水的張松枝。松枝雖已年屆58歲，但他不但展現了超靈活及超而有力的身手，跑速亦絕對不輸出名跑得的張振朗。松枝透露好身手其實是努力多年累積回來，「身手都係多年拍攝經驗累積返嚟嘅、平時都有做開帶氧運動同拉筋、不過最緊要都喺我哋嘅武術指導、同埋導演攝影配合、佢哋設計好個動作概念、先有咁好效果。」問到拍攝場口是否很地獄，松枝直認不諱，並笑言每日收工後都變「黑色鼻窿」，「現場冇冷氣兼且密不透風，仲好多塵埃，抖氣非常困難，每日收工返去個鼻孔都係黑色嘅。呢個場口係非常辛苦嘅，每日拍至少17個鐘、全程動作真係唔係講笑。不過保怡同製片組都keep住有萬歲提供冰凍飲品畀大家。」
松枝是次飾演性格暴戾的昱水絕對入型入格，除了獲大讚「夠晒變態」，他的招牌「露齒奸笑」亦引發迴響，並被同劇演員笑言是「父親節最佳笑容」，相當爆笑。對此，松枝親揭「露齒奸笑」設計概念：「呢個角色係非常有自信同自我、認為其他人都係廢物、仲會恥笑佢哋。咁呢個笑容就可以令到角色更加狂妄、更加可以令到觀眾覺得有種心寒嘅感覺。至於點解呢個角色會專用刀，就係因為正所謂笑裡藏刀、況且用刀配合埋武打動作，視覺上用比用槍強烈好多。」
