留心社會，留心政局，會覺得世界好恐怖，人心好虛假，負面情緒非常濃烈，單從一宗「小」事看，就知道人心如何？一個片段看得人毛骨悚然，那只是實驗室中的測試；兩部同型號，同製造廠生產的汽車，以同一速度迎頭相撞，一部被插至錶板位為止，另一部直撞至駕駛座。就係話，被插至駕駛座的司機，唔死都重傷矣。為什麼兩部同一型號汽車有咁大分別？無他，只為較完好一部進口美國，被撞實死冇生嗰部响墨西哥買，墨西哥人命賤，不妨死多幾個，那兩部車並非中國產品，係日本名廠出品。
再去看新聞，美國兩個總統候選人，都唔係好人，分別只係點衰法而已。一個奸出面奸出汁，一個皮笑肉不笑，奸入骨。是但選一件都係大災難，睇睇啲國仔，菲律賓杜特爾特擺明車馬，做你美國佬馬前卒，行又行先，死又死先，仲要俾雞碎咁多小恩小惠，伸手攞錢要俾面色你睇。話反面就反面，擦過第個闊佬鞋，你咬我嚟食呀？
返轉頭睇呢個梁特，十個人九個話睇佢個頭，憎到落佢隻腳，憎又點？話唔埋仲要對多佢四年，到時咪話唔信命，我等心血少之人趁仲有啲時間食定多啲強心保肝丸，以防幾個月後抵受唔到刺激。
前邊講一輪奸人當道，係唔係呢個世界冇個好人？梗係唔係啦，只不過凡好人者都唔會講我係好人，好多好人做完好事都冇人知。有能力嘅好人為數亦不少，如果冇呢班人平衡世界，早早就不成世界了，各位好人大佬，係時間要企出嚟幫香港啦！