由陳豪、張曦雯、馬貫東、丁子朗、劉佩玥、譚凱琪、馮皓揚、郭柏妍、游嘉欣、鄭子誠等主演的無綫劇集《俠醫》，昨晚（5日）播出第五集，丁子朗飾演的鄧世鏗可謂使壞升級，除了與「廢柴老豆」鄧力圖（鄭子誠 飾），以陰招騙菊婆婆（程可為 飾）賣樓兼落井下石踩多腳，又兩度向Rachel（張曦雯 飾）霸王硬上弓；其中在夜店、以極賤格及鄙視嘴臉、鬧爆阿Nat（劉佩玥 飾）一幕，成為網民熱議的「名場面」。
事緣阿Nat妒忌世鏗因Rachel（張曦雯 飾）冷待自己，遂以世鏗半裸照威脅男方到夜店見面；豈料世鏗不但冇有怕、還囂張地高舉自己半裸照任人欣賞：「大家過嚟吖，我張相嚟㗎，英唔英偉呀？」之後再拿出阿Nat裸照益街坊兼辱罵阿Nat，極盡瘋狂賤格：「你唔夠玩嘅唔好同我玩，我驚到時蝕底嗰個係你咋！」凌辱完阿Nat後，世鏗露出不可一世奸險樣，再攤開雙手表示萬歲，網民讚丁子朗演衣冠禽獸入型入格。
談到首度挑戰大奸角即成功入屋，丁子朗稱感恩，有網民讚他「蹙眉」動作有心思兼有意思，他坦言開心：「蹙眉呢個動作，我都做得幾多，尤其對住我老竇時，因為佢喺我心目中只係廢柴、冇謀略，但我覺得我有謀略，就睇唔起老竇、睇唔起屋企人，覺得自己叻過晒佢哋，估唔到有人留意到，我都有親身留言多謝大家。」
問到拍攝強吻Kelly場口會否很大壓力時，丁子朗直認不諱，並感激Kelly予以百分百信任及支持：「佢好好，佢叫我放心，仲話『你隨便做啦，我一定會隨時配合你』，好開心佢畀到呢個信任我，阿Moon都係畀咗101%信任我。」
談到劇中要應付不少除衫場口，他表示為保持身形在最佳狀態，每次拍曬肌場口前先餓足2日，並瘦了10磅：「每次拍除衫戲前，我都會2日唔食固體食物、主要飲流質嘢，將身體多餘嘅嘢排走佢，然後再去做gym。每次拍完除衫戲都好攰，想即刻食包糖，平時我係完全唔食零食嘅人，可能就係因為太辛苦，我就慢慢變瘦咗，拍完套劇前後瘦咗10磅左右。」
