羅天宇跪住出場晒Rap功。
《中年好聲音4》昨（19日）晚播映「團隊搶分戰」下半場，首先出場的「獅子王」羅天宇，一改之前唱抒情路線，破格戴上黑超及穿上皮褸，化身「未來戰士」單膝跪地出場，獻唱《Why You Gonna Lie》大騷Rap功，唱到尾段更大跳勁舞，專程到場支持天宇的緋聞女友陳懿德睇到勁開心，陳懿德更歡呼兼拍掌。
陳懿德睇到歡呼兼拍手。
談及選歌原因，天宇自爆一直有個男團夢：「咁多年後，有機會嚟到呢個舞台，咁我梗係要追吓夢啦。」希望以不一樣的羅天宇帶給觀眾驚喜。可惜最後羅天宇的「尤淑情隊」以總分3：5敗給「吳亦偉隊」，最終天宇與楊嘉瓏被淘汰。
天宇以87分後被淘汰，引來不少熱議，他今日在社交網發文，留言：「好感激大家每一個嘅留言，我全部都有睇。好可惜冇得呢個舞台上繼續唱歌俾大家聽，係我唔爭氣！不過我會繼續努力！希望將來會有更多嘅機會再喺台上感動大家，多謝中年好聲音嘅台前幕後，再見獅子王」！在節目中表示沒遺憾，發片自述感言時卻坦言有點可惜，一來不捨《中聲》舞台，二來沒唱到自己一首滿意歌曲。
同為參賽者兼好友的周志康亦發長文鼓勵天宇：「由一開始你決定參賽，我已經覺得你贏咗。因為了解你嘅朋友都知道，你係一個極度怕羞嘅人。我一直想像唔到你企喺台上參加歌唱比賽嘅畫面，但係見到你每一次上台，都用盡你嘅所能，克服心跳加速、呼吸困難、腳震手震，去唱好每一首歌。」阿康續爆料這期間：「我睇住你搵好多歌唱老師去增進自己嘅唱功，幾乎每日都去練歌，證明你真係好想進步。去到今日呢場比賽，你真係型到爆炸！結果或者不如意，但經過呢段時間嘅比賽，你真係有好大好大嘅進步。（好想你繼續留喺呢個比賽陪住我，同我一齊共同進退。）」
