郭富城除了是舞台王者，原來棟篤笑都有一手，近日他在廣州開騷，跳唱到身水身汗後，他在台上跟歌迷笑說：「我同你一樣咁大㗎咋嘛係咪啊！30零40歲咋嘛，廿年前，係廿年前，係！好榮幸我今年『登六』，啱啱踏入60歲。講都冇人信，我自己都唔相信，我個身份證係咪整錯咗啊？冇理由㗎，我邊忽似60歲呢？我個女仲啱啱出世，一歲都未夠。唉，我都唔明，呢啲係咪叫逆生長？」引得觀眾開心大笑的他續說：「我都無食錯嘢㗎，都係飲吓水、飲吓咖啡啫，但我一日飲幾十杯咖啡啊！係，我係好鍾意飲咖啡，大家都知，係啊，所以我都唔明，唉，愈嚟愈後生，咁點算呢！」城城跟住笑謂：「我好驚喎，我唔可以俾啲歌迷老過我喎！」更氹歌迷說：「我老好啦，你哋唔好老。」
城城又做香港旅遊推廣大使，問歌迷會否來香港探他說：「多啲嚟香港玩吖，我成日喺銅鑼灣㗎，中環都有去嘅，我住喺灣仔附近，你哋真係會嚟？我請你食菠蘿包，加多碗雲吞麵，夾多塊牛油喺菠蘿包裏面，仲有一樣嘢我請你飲咖啡好冇？我最鍾意飲咖啡㗎啦！」
