呂良偉70歲金雞獨立冇難度
70歲呂良偉前兩日去廣州越秀公園，被粉絲圍住叫佢教幾招保養之道，呂哥示範「呂氏馬步」，提醒大家一定要「慢落」，他說：「正所謂人老腳先老，所以一定要練腳力，老人家覺得雙腳不夠力，練呢招非常有效，記住千萬不要急進，一開始每次練三下已經足夠。」大家圍住他叫哥哥，還有小朋友一齊合照留念，現場有位長者與呂哥同年雙腳已經冇力，呂哥表示就算九十歲都可以練，又教大家飯後原地踮腳，他指食物進入身體轉化為葡萄糖進入血管，飯後原地踮腳可以將糖份轉化為肌力。
呂哥愈活愈年輕，近年注意養生不時在社交網分享心得，他表示立春後最緊要做足三件，第一是「以光醒陽」，朝早起身或午後晒十分鐘太陽，最緊要晒肩頸和後腰，可以激活沉眠了一冬的陽氣；第二是「以食順時」，以當造薺菜、豌豆、紅棗中和春寒，如果想加強防護可以少量搭配海參、燕窩、蟲草滋補；第三是「以柔導氣」，冬天少郁動氣血阻滯會出現「春困」，朝早起身不需要猛練，做踮腳和適量拉伸，不需要出汗已經可以增強元氣。
