拍攝過不少大製作電影如《怒火》、《金手指》、《神探大戰》與《海關戰線》等的演員楊天宇（Angus），最近踩過界參加由謝霆鋒擔任評審的內地廚藝PK真人騷《一飯封神》。
Angus首次跟各大酒店、餐廳主廚同場較量，雖然壓力爆煲，但憑住一道「蝦蝦蝦籽麵」及陽光笑容，成功俘虜現場一眾女生，更被網民狂推成為「全場最靚仔主廚」。
首次參賽，Angus坦言緊張又興奮，而且心態上亦有不少改變，「知道要比賽之後，成個人嘅煮嘢食心態都唔同晒！以前煮嘢食純粹為開心，見到身邊人食得開心就夠，見到佢哋食完好開心嘅樣，我就覺得好幸福，但依家會諗點樣將一碟餸做到極致，真係感受到廚師壓力！」他又指見到其他星級主廚在高壓環境下，依然淡定煮食，令他大開眼界。
參加比賽的每位主廚，都有一個最代表自己的名稱，Angus將自己的參賽名稱改為「料理不NG」，原來大有喻意，「拍戲可以NG，但比賽一失誤就會被淘汰，所以叫『料理不NG』，提醒自己要做到最好，仲帶少少玩味成分！」果然有腦又有樣。
Angus的參賽菜式「蝦蝦蝦籽麵」亦大有來頭，他原本想用意大利粉，但覺得不夠原創，最後靈機一觸，改用富香港特色的蝦子麵，再加蝦子及以蝦乾熬湯，整個配搭鮮味爆燈，「我特別鍾意食海鮮，所以一定要用蝦做主角。」而Angus的一身廚藝，原來是從留學時期練成，「留學時期煮嘢食次數開始頻密，後來發現就算煮同一道菜，無論你調味、火候或時間有少少唔同，出嚟都會有好大分別嘅時候，就開始喜歡煮飯。」最近他更迷上研究西式醬汁，每次下廚都會試新嘢，務求擴闊自己的「美食知識庫」。
節目出街後，Angus被一眾網民封為「最靚仔廚師」，Angus謙虛話：「同咁多米芝蓮星級廚師比賽，真係有啲無力感！不過好多謝觀眾支持，好開心有觀眾留意到自己，我會繼續努力！」不過現場工作人員爆料，指Angus一出場，就立即引來全場女生尖叫，連評審都忍唔住望多佢兩眼！
