打造過謝霆鋒、容祖兒無數經典，亦一手捧紅Twins登上天團之列的金牌監製伍樂城，入行30年風光背後原來滿佈血汗。近日他接受雷霆881《星光背後》專訪，暢談由牛頭角下邨走到流行樂壇巔峰的奮鬥史，更大爆與謝霆鋒、阿Sa及阿嬌合作的難忘點滴。
伍樂城自小在基層家庭長大，九歲學琴，之後遠赴美國伯克利音樂學院修讀音樂製作及電影配樂。為了交學費，他五年間「無返過香港」，兼職做Waiter、卡拉OK DJ，甚至在音樂廳做帶位員。雖然辛苦到無得坐，但獲得近距離欣賞各大巨星演出，包括Celine Dion，讓他領悟音樂無分門派，「好多嘢我以為無乜特別，但表演期間原來玩得好正！」
95年回港後，他憑《衣櫃裡的男人》受到賞識，先後為謝霆鋒打造《無聲彷有聲》、《愛後餘生》、《非走不可》等作品。外界印象中霆鋒少說話及火爆，但伍樂城反而覺得：「我同佢合作無嘢喎，同佢溝通係最簡單直接！最記得《非走不可》，因為佢一邊錄我一邊諗到歌名，公司覺得唔吉利唔想用，係霆鋒撐呢個歌名。」
霆鋒的成功亦令英皇將初出道的Twins交予伍樂城打造。由校園情懷到青春能量，他見證二人爆紅歷程，「佢哋好早已經忙到死，一年等於人哋五、六年，未出道仲好啲，佢哋嘅Schedule係痴線嘅，突然間就話要出，唔係一首歌喎，係一隻碟，好彩係兩個，嚟到一個瞓一陣先，一個叫嘢食錄歌先，所以連我根本都無得瞓，但亦訓練到我無乜問題解決唔到。」
伍樂城更曾與四大天王合作，其中最夢幻是劉德華、梁朝偉合唱的《無間道》，助他登上金像獎舞台拿下2003年最佳電影原創歌曲。回想當年投稿，他笑指全靠飯桌上靈感爆發，「佢（陳德建）話有套電影：『兵就係賊，賊就係兵！』我就即刻諗到Intro，即喺餐廳攞紙巾寫低。」結果擊敗所有對手成功入選，但亦「驚喜到失眠」，「最後佢話恭喜我，我嗰陣幾日都瞓唔著，End Up中咗，係好開心。」
