雲浩影（Cloud）最近推出新歌《你的損失》，早前飛往台南拍攝MV，雖然來去匆匆，但她仍然好興奮，因為經歷了三個第一次——第一次唱台式硬淨風格的情歌、第一次踏足台南，而且第一次親眼看見粉紅色夕陽。可惜，她此行發燒抱恙，無法享受當地美食，收工更疲累得無力進食，直接蒙頭大睡！
Cloud今次嘗試新曲風，是伴她成長的台式硬淨歌路，「新歌由Kudos Lam作曲，黃偉文填詞，蘇道哲和Kudos Lam編曲，蘇道哲監製。今次去咗台南拍MV，亦都係我人生第一次踏足台南。《你的損失》係一首台式情歌，有啲似我細細個聽嘅嗰類，張惠妹同埋A-Lin嘅歌，仲特登選擇去台灣拍MV。」
一向予人柔弱感覺的Cloud，新歌由歌詞到唱腔都令人感到「硬淨」，連文案都散發一種堅強感覺，「雖然你把我寵得像公主，但背叛公主的騎士，我不要了！沒有你的世界，或許辛苦一點，狼狽一點‥‥‥但至少沒有心碎」，MV由金像剪接大師李謙明擔任導演，這是她與Cloud第三度合作，默契十足。Cloud分享說：「好開心今次喺台南拍MV，我哋去咗好多好靚嘅景點，仲睇咗我人生目前No.1嘅夕陽，全個天空都係粉紅色㗎！」
Cloud在MV中獨自欣賞夕陽、沙灘漫步、吹肥皂泡、夜市玩攤位，凸顯一個人都可以很快樂。她說：「去咗夜市拍攝，可惜我唔舒服，食唔到好味嘅嘢，加上發燒，收工返到酒店時太攰，嗌咗外賣都攰到食唔到，成個人冧咗！」返港好好休息後，Cloud經已滿血復活，全力投入演唱會準備中。
