廿四孝Daddy古巨基（基仔）喺疫情下為囝囝Kuson嘅健康閉關咗一年，對上一次出歌已經係2019年嘅《亂世情侶》，幾日前基仔突然係網台節目《靚媽圍爐》亮相，暢談迎接第二個父親節嘅感受，仲預告將會正式出關。
日前基仔係Instagram出post公開出關企劃全新專輯《 I REALLY LOVE TO SING 》。 《 I. R. L. T. S 》音樂企劃將分為兩張專輯推出，Album1會邀請10個「值得被更多樂迷喜歡嘅新晉歌手或樂隊組合」，同基仔改編合唱10首粵語單曲。而Album2 則會邀請全班新晉創作人、唱作人或唱作樂隊，為基仔創作同製作10首全新嘅粵語作品。
呢個專輯嘅全製作過程仲會同步公開，因為基仔想俾樂迷們參與brainstorming同緊貼製作進展每一步，所以由宣布概念post開始到專輯完成，當中所有製作過程基仔都會係Facebook、Instagram同大家分享。而率先啟動嘅係「Album 1」收錄翻唱作品，基仔預告將在今晚10時同時係Facebook同Instagram舉行直播，收集觀眾意見，認識一啲有才華、實力嘅新晉歌手、樂隊或組合，歌手不論嚟自邊一間唱片公司，甚至係獨立歌手都有機會一齊合作。因為佢認為香港樂壇有好多好歌聲，值得俾更多人聽到！最後更勉勵後輩，話而家係樂壇繼續唱、繼續默默努力嘅每位歌手，心底一定都有呢一句：「我真係好鍾意唱歌呀！」
圖片來源：古巨基＠Instagram、Facebook
