回望過去十年，黎耀祥的星運及經濟變化相當大，他笑言連外貌都老了，唯一不變就是心態，「入行一刻心態已好穩定，因為由一開始我都唔覺得自己是大明星，當年入行時是黃日華、苗僑偉、梁朝偉及劉德華的年代，每個都高大、靚仔，所以我唔覺自己會是主角，好清楚知道無條件做，即使後來紅了，我亦唔覺自己是明星，只是大家因為我工作的崗位而熟悉我，所以我從來都無變過，正因這個心態，衰啲講句有無觀眾都唔重要，我最大享受就是拍攝時的過程，所以那麼多年來，大家都會覺得我好享受工作。而且我每個階段都停留得太耐，你點囂得起？入行後做了十幾廿年都仲做路人甲乙，囂乜鬼？」
首拍國內劇，令他重拾初衷，「今次拍國內劇，算是對自己一種挑戰及要求，要求自己用普通話去演，因為好怕我說廣東話，對方就說普通話，有種牛頭唔搭馬嘴的感覺，但又唔可以要求對方用廣東話，所以今次自己百分之九十都是用普通話來演繹，只是有些對白，條脷捲唔切，轉唔切一些字先用廣東話。」
貴為三屆視帝，今次參演《鳳弈》降格做男二，祥仔說從來不會想這問題，「我拍劇，無論男一或男二，我都沒有心理障礙，不會影響我，對我來說每個角色都重要，況且入行以來都是由路人甲乙演起，配角都演了十幾年，衰啲講句我怕乜？相反我好享受做配角的工作狀態，因為做主角好攰，場場都有你份，但是否真的每一場都需要你呢？又不是，只不過一定要有你存在，但又未必有戲演喎；相反配角就不同，你一出現就是要演戲，話明配角嘛，你一出來就是要配襯，不會有什麼無謂場口，正因為沒那麼多場口，休息時間就自然會多，今次齣劇我只是有三百多場戲，而女主角有八百多場戲，她即使一日拍十場戲都要拍九十日，你諗吓會變成什麼狀態？真係諗起都想死，所以做配角好處就是有足夠休息及研究劇本的時間，做好角色，每次當主角演到攰，你就精神飽滿行出來演，你睇幾着數？最重要觀眾會分別每個角色演得好與唔好，所以男一男二對我來說沒什麼所謂。」
自從做「柴九」爆紅，近十年工作不斷，他笑言已賺夠，目前與太太享受人生，最近與太太齊齊榨菜汁代正餐，成功減磅，「近日開始多飲菜汁，以羽衣甘藍這種菜為主，幾隻菜榨汁來喝，因為有位同事就是榨菜汁飲，由三百磅減到百多磅，就覺得幾神奇，又有效，而且可以醫治三高問題，所以咪試，最重要我同太太都開始年紀大，要注意身體，食少一餐就一餐，試過三日淨飲菜汁，一肚餓就飲，其實怎樣飲都會肚餓，但我想試驗有什麼感覺，不過三日之後頂唔順，就食一餐早餐，慢慢你的胃口就會收細，就不會覺得肚餓，現在無特別都主要飲菜汁，已經十日瘦了幾磅，但如果有朋友約食飯都會照正常吃的。」