街上，偶爾會遇上一些對服飾講究、擁有強烈個人風格的長者，哪怕只是擦身而過，也會放慢腳步「望多兩眼」。這羣「型格長者」或許不曾追趕年輕人的時尚步伐，但歲月在他們身上沉澱出的自信與從容，卻不是當下任何潮流可複製。
究竟他們的「風格」是如何煉成的？在旁觀者眼中，這些長者似乎游離於主流流行趨勢之外，但他們對自身服飾配搭，卻有一份旁人毋庸置喙的堅持。
不管是看似漫不經心的隨手配搭，或是一望可知的刻意經營，一眾風格迥異的「街頭型格大師」，實實在在，為這沉悶的城市，帶來驚喜。
「老襯」不止「老襯」，實實在在，我行我素，「招搖過市」，真係「成街都震」。
⚡ 文章目錄
花姐 65歲
性格豪爽、身材高䠷，現職物流車場管理員的「花姐」。最近更榮升為一對龍鳳胎孫仔孫女的婆婆。閒時喜歡追看「打到飛起」的武俠小說消磨時間，慣作中性打扮。工作環境以及日常聯誼，早已習慣與一大班「佬」為伴，不拘小節。不過花姐對自己的形象卻十分堅持，總之，兩個字：要型。
因應當天心情，選擇不同風格的套裝衫褲，再配襯各款帽子和「黑超」，是花姐每日上班前的日常。例如今天可以是全黑裝束配上一頂西部牛仔帽；明天換上全套軍綠工裝配闊邊帽，甚至興之所至，後天全套鮮紅套裝再加金色背心外套，再配一頂牛仔帽以及一幅浮誇太陽眼鏡，務求形象每日不同。她的同事以及一衆飯腳「師兄」，早已見怪不怪。
兩個專屬衣帽間 52kg的秘密
在她家中，甚至有兩個專屬的衣帽間，成為那百變形象的堅實後盾。
除了外觀，花姐對自己身形亦嚴格管理，每日晚餐堅決「澱粉不埋身」，加上日常有一定的工作量，因此體重長期控制在五十二公斤。
「要有咁嘅身形，先晾得起件衫，著到出嚟先至有型。係車場（工作地點）或者同班朋友出嚟食飯，最sharp、最搶眼嗰個一定係我。」
婆婆Choice 65歲
Choice有兩個孫，朋友之間，親切地直呼「婆婆」，而她亦欣然接受這稱呼。退休後的她，現在主要工作是「弄孫為樂」，兩孫每日返學、放學，由她一手包辦。雖說接送是每天例行公事，但婆婆一點都不會馬虎，堅持每天以不同造型亮相，衣服、鞋襪以及穿戴的小飾物，全部諗過度過。「我習慣啲衫唔會重複連續著兩日。」
Hania正是婆婆孫女，十一歲，在她眼中，媽咪和婆婆雖然同樣喜歡扮靚，但兩者卻有一些「微妙」差別。「婆婆每次出門都好快又好靚咁著好衫出得門口，但媽咪有時就會揀衫耐啲啲囉……試過我同細佬話唔太好睇，媽咪又會換過晒啲衫，又再等耐少少……不過媽咪都係好少次係咁。」
「從潮」開始扮靚 伊勢丹到Mark哥褸
婆婆自小喜歡扮靚，年輕時已留意日本潮流雜誌，閒時愛逛尖沙咀伊勢丹，每年年三十晚銅鑼灣松阪屋的大減價，也會和當時男友（現時丈夫）到場掃貨。七十年代末，盛極一時的「油脂裝」，到了八十年代，《英雄本色》的Mark哥褸，鍾楚紅超貼身牛仔褲……當年潮流經典，婆婆從不缺席。直至九十年代女兒出世，因全心照顧家庭，婆婆追逐潮流的熱情才慢慢減退，但一顆喜歡扮靚的心依然不變。
「我依家仍然會留意潮流資訊，知道依家興啲乜㗎。對我嚟講，呢啲係保持活力又能夠知道世界發生乜嘢事嘅方法。」
「白頭佬」蕭先生 75歲
長洲街坊口中的「白頭佬」蕭先生，在島上經營「車仔麵」近三十年，是一衆街坊心目中的「島上名物」。近年交棒給兩位公子主力打理，自己就戲稱是店內公關，負責招呼街坊「喂，坐呀，今日又食啲乜嘢。」
悠閒Hea樣 闊袍大袖配一頭銀髮
在街坊眼中，蕭先生永遠散發一種悠然自得的鬆弛狀態，大碼背心、短褲、涼鞋是他的招牌服裝，閒時喜歡坐在店前，架起一雙二郎腿，任由微風吹過他那頭上銀絲，懶洋洋觀看街坊經過，順便打聲招呼。蕭先生年輕時行船，後來因為想成家立室，才上返岸，告別船員生涯。做過廣告印刷，又開過服裝店，其後回歸長洲，經營車仔麵，直至現在。在行船九年期間去過三十多個國家，除了遊歷世界，也會選購當地適合自己的服飾。難怪他本人也聲稱自己是一位「貪靚之人士」。
平日慣以街坊裝亮相的蕭先生，偶爾放假「出省」辦事，就會打扮一番，例如搖滾型的大碼T恤、闊身牛仔褲加件「哈利」皮背心、又或者飄逸形的淨色闊身麻質套裝等等……
「我揀衫唔鍾意標奇立異，又冇乜特定風格，最緊要闊袍大袖，無拘無束，隨心、啱feel就夠。」
「陳師傅」陳卓歡 70+歲
衣著搶眼、出口成文的陳師傅，是位在鴨寮街街頭擺檔的玄學師傅。第一眼看見他時，印象最深必定是他的「龍紋圖案花恤衫」。不是那件鮮紅底色印有金龍圖案的，就是那件寶藍底色加黃龍圖案的，又或者另一件綠底色加紅龍圖案的。無論是甚麼顏色的恤衫，他那條招牌紅色領呔一定不可缺少。這些非一般人能駕馭的顏色，正是陳師傅將玄學五行融入生活的具體例證。
紅加金、藍溝黃 襯到佢好搶眼
「金、木、水、火、土，相生相剋，我本身命格屬火，正所謂火不忌紅，愈紅就愈旺，所以紅色會為我帶嚟好運。藍色、綠色屬木，木生火，亦會有利於我。還有白色，白色屬金，火剋金，金就為我所用。我會避免配戴黑色，黑色屬水，水就會剋我啦。」
至於為何要有龍紋圖案呢？
「搶眼嘛，喺條街度，遠遠都睇到，而且俾人莊嚴、穩重嘅感覺。」
還有那條不可缺少的領呔呢？
「除咗紅色利我，打呔俾人印象斯文啲，俗語有云：人醜望衣裝。所以衣裝儀表係好重要㗎，尤其做我哋呢行（玄學）。我平時出街都會打呔。仲有疫情後，我連自己頭髮都自己剪埋，咁先百分百啱自己心水嘛。」
不過，陳師傅你……那個長期跟身的腰包，不也是黑色嗎？又唔怕相剋嗎？
「呢個——係阿囡送㗎，邊計得咁多呀！」
陳姑娘 80歲
笑容和藹、福氣滿滿的陳姑娘，如今兒孫滿堂，正式邁入四代同堂的幸福生活。貴為曾太婆的她依然中氣十足、口若懸河。
啊~啊 姑娘八十一朵花
二十七歲那年，她與丈夫一同開了一間地產舖。她總喜歡穿著鮮豔色系的衣服，好讓客人留下更深印象。一做就做了三十六個年頭。後來，她膝蓋出現問題，要做手術，之後有一大段時間要坐輪椅代步。不過，陳姑娘憑着樂觀和非凡毅力，一步一步反覆練習，五年後，她已經可以靠輔助步行器獨自逛街。今時今日，每逢下午茶時段，陳姑娘必定襯到「彩雀咁靚」，尤其喜歡橙色、紅色，到熟悉的餐廳享受「一盅兩件」。
「依家阿女負責幫我上網買衫囉，佢知我細細個時就已經鍾意鮮色，橙色、紅色著出嚟先夠搶眼，先至夠威！仲有依家阿女同孫女都好鍾意咁著，不過佢哋個胸口位就開得再底啲，嘩……著到不知幾靚。」
