Twins明年1月21-23及25-27日舉行演唱會《TWINS SPIRIT SINCE 2001 LIVE IN HONG KONG》，今早（15日）進行優先訂購，秒速售罄。主辦單位英皇娛樂開心宣布，加開兩場，由6場變8場，門票將於11月22日起在城市售票網公開發售！Twins過去於紅館，最多開5場演唱會，今次破紀錄開8場，不單令粉絲興奮若狂，亦令蔡卓妍（阿SA）和鐘欣潼（阿嬌）好開心，阿SA謂︰「以組合來講，入行22年仲可以開演唱會，企喺個台度同大家慶祝，真係好難得！所以呢個演唱會對我哋嚟講係好有意義！知道咁多人仲繼續支持我哋，又感動又開心！希望到時大家可以有一個好好玩嘅晚上。」
今次演唱會的公開發售日期，正是阿SA生日，而演唱會頭場，就是阿嬌生辰，問到兩人是否特登選擇這兩個日子？阿SA表示，「梗係唔係啦，真係咁橋喎，紅館期邊有得揀話想邊日，第一次公司同我哋講個開騷日期，我地都覺得好奇妙，所以公司就話，不如係我生日個日公開發售啦！咁兩個生日都可以雙喜臨門啦！」阿嬌表示，「揀得中呢兩個日子售票同開show都係第一次，覺得好開心好受重視，哈哈。加場雖然開心，但都開始有啲壓力㗎，希望到時可以做到最好俾大家！」昨日（14日）兩人為演唱會開始籌備開會，阿嬌因身在外地工作，只能用電話Facetime參與，齊齊開了4小時會議，又一起揀歌，阿SA更即時自行排舞給阿嬌看，令人十分期待！