TWINS相隔9年，宣布將於2024 年1月21-23、25-27日於紅館舉行6場 《TWINS SPIRIT》演唱會，今次以《SPIRIT》為演唱會主題，準備帶給大家TWINS的精神及成軍廿多年的回憶與感動。蔡卓妍（阿Sa）、鐘欣潼（阿嬌）早前為演唱會拍攝宣傳海報，兩人穿上紅色的不同造形拍攝，又性感又活力， 拍攝兩人互毆搞笑動作時，阿嬌爬到阿Sa身上，突然失去平衡，兩人尖叫倒地，工作人員馬上上前援救，幸好兩人也沒有扭傷，笑成一團。阿Sa表示：「佢跌嗰下真係嚇鬼死，哈哈….我想用力拉住佢都搞唔掂，因為我唔係抱住佢，佢喺我背脊，好彩我哋喺地面仲有個木箱托一托，所以阿嬌都冇事。」阿嬌：「冇事，哈哈，其實唯一喺旁邊用吹風機個工作人員，佢撲過來想幫我，我又跌得太快，佢手上面支吹風槍就撞正我頸到囉，嗰下有少少痛。」
談到今次演唱會主題《TWINS SPIRIT》，阿嬌：「即係 Twins 精神，雖然見到poster我哋喺到互毆，但係我哋個精神就係永不放手，所以廿年來都冇放開過對方！即係同今日影相嗰時一樣，永不放手，跌低一齊跌低，起身一齊起身！」阿Sa：「就係咁多年坐埋一條船，無論順境逆境都一齊，開心一齊開心，唔開心一齊唔開心。今次有咁嘅構思，係因為廿多年來我哋實在影過太多靚相啦，想影啲靚又有另類啲感覺嘅，所以就影啲好玩啲。」之前阿Sa 聲帶有事，問到她是否完全康復？阿Sa笑一笑：「都有少少擔心㗎，不過我估ok嘅。」至於演唱會有什麼新意帶給觀眾，兩人表示今次除了舊班底外，也加入了一些新班底合作，所以一定更精采。阿嬌：「我估我哋會比過去演出都辛苦，因為加好多新嘢！不過好期待，辛苦得來應該係值得同好開心。」