黎耀祥早前趁有十日假期，與太太Julia飛到美國探望讀大學的阿仔黎正橋，祥仔更為家人下廚，享受家庭樂，「因為以前拍劇忙，很少有機會親自下廚，今次就可以順理成章，去旅行無理由日日出街食，有時候都想食吓中菜，咁我中式炒嘢比較叻，阿仔就最拿手煎牛扒，所以大家就輪流煮，想返起都應該十幾廿年冇一家三口在屋企煮飯，老實講句，都真的幾天倫之樂。我覺得現在的生活很好，工作與家庭叫搵返平衡，以前每日拍劇，回家瞓兩，三小時就起身再開工，同老婆打個招呼就要出門口，傾都傾唔到多一句，現在才感覺到生活的意義。今次美國之行，最開心就是可以一家三口去超級市場買餸，大家都知美國超級市場好大，人又唔多，最重要是沒有人認識你嘛！可以好自在咁享受，你在香港一出街就會被人認得，禮貌上都要不停同人打招呼，所以今次完全令我好生活化咁去旅行，真的好開心。」
囝囝正橋今年廿一歲，還有兩年才完成大學課程，祥仔表示仔大仔世界，感情事絕不干涉，最重要學業為重，「我同太太那麼多年都不會催他識女仔，感情事由他自己發展，而且他在香港已經有女朋友，但有排都未到談婚論嫁的地步，我就未見過他的女友，只是兩父子偶然傾偈時會講到的話題，聽就算，不會刻意去插手管，後生仔拍拖好正常，既然又未去到結婚，就無謂管太多，如果將來換十個八個，唔通個個都問長問短咩？大個仔了，感情事他自己會識得處理，最重要生活過得開心。（會否傳授好男人秘技？）你看他平時鍾意煮嘢食就知，他都很家庭型，其實我一直都覺得父母身教很重要，有時候真的很難大條道理去告訴他怎樣做人，我與太太很家庭型，相信他都是屬於這類，不需要特別教。」
近年轉戰國內發展的祥仔，除了拍攝國內劇集及登台外，他希望嘗試不同的角色，故現在接劇時會特別嚴選，「自己真的不想再去演一些好男人，錫老婆……好似大家印象中的我只可以這樣，有時我都覺得好悶，希望將來再有監製找我，都可以安排一些比較特別的角色去演；現在我真的最怕演好人，總之任何角色或階層都無所謂，但要特別，至少令我覺得有特別的想法，而不再是你只可以演好人，對人好之類的角色，我明白很多製作人覺得你人好，不會故意搞到你好奸。」
為了做不一樣的黎耀祥，他決定與國內製作公司合作，拍攝有趣的短視頻，進攻國內網上平台，「現在的工作比較有選擇，不像以前那樣，什麼都要去做，除了登台及商演外，其實仍有好多嘢可以做，現在開始每個月都要幫國內拍兩至三條得意的短視頻，利用自己的知名度去吸引fans閱覽及點擊，經營自己網上平台，如果成功就會吸引好多商家及廣告主動找你，在你網上平台落廣告，對我來說都幾新鮮。」