《2023香港小姐競選》16位佳麗，1號吳詠婷（Anna）、2號黃泳嘉（Jessica）、3號鄧凱文（Eris）、4號王怡然（Lynn）、5號梁倩淇（Debbie）、6號胡睿涵（Hanna）、7號毛志琛（Viktoria）、8號姜依宁（Jenny）、9號潘明璇（Michelle）、10號陳霈錤（Hera）、12號梁晶晶（Nicole）、13號陳曉彤（Cindy）、14號陳怡名（Zora）、15號莊子璇（Hilary）、16號郭珮文（Juliana）、17號王敏慈（Lovelle），在嘉賓主持黎諾懿及兩位師姐謝嘉怡及梁凱晴帶領下，前往越南峴港及會安拍攝外景，而11號周婷（Jennifer）因事缺席。
16位佳麗穿着仙氣白裙，進行第二日外景拍攝，前往被列為世界文化遺產的美山聖地拍攝MV。經過連日來密集式訓練，16位佳麗除了擺甫士及跳舞愈見有板有眼，無論鏡頭背後多熱多累，只要一見到鏡頭即能馬上綻放甜美笑容；而經過連日來「朝見口、晚見面」，佳麗間感情明顯升溫，不用埋位時眾人Keep住「雞啄唔斷」兼有講有笑，連接受無綫娛樂新聞台訪問時亦要抱在一起。
美山聖地外景拍攝初段烈日當空，台前幕後都熱得汗流浹背，但中途卻忽然行雷閃電兼暴雨，令拍攝流程數度被打斷。對於拍攝外景日曬又雨淋，佳麗們表示雖然辛苦，但感恩獲工作人員貼心照顧，除Keep住有專業人員幫她們補妝及整理衣服，更貼心地事先預備好雨傘。6號胡睿涵說：「行雷閃電？唔驚呀，工作人員好有準備，一早準備定遮，好照顧我哋。」感覺較為害羞的8號姜依宁，與13號陳曉彤及15號莊子璇被踢爆前一晚排舞時因壓力大爆喊，對此姜依宁解釋：「我覺得自己做得唔夠好，笑容唔夠，要更加努力。」她感謝身旁兩位戰友全程陪伴及打氣，才令自己馬上破涕為笑。三人又指現在已變成「笑容專員」，無論是大會鏡頭或工作人員手機，只要一對着自己便能展現燦爛笑容。
佳麗們又互爆趣事，結果以莊子璇的「過時面膜」及4號王怡然的「周身冇蚊」事件最有娛樂性。莊子璇說：「噚晚我哋大概一點零瞓，但瞓前點都要敷個mask；我敷住咁去咗第二位佳麗間房，點知冇為意瞓着咗！個零鐘後醒番塊面膜已經乾晒，咁樣反而弄巧反拙。」王怡然則說：「我同Zora（14號陳怡名）去買嘢，大家都以為大家身上有錢，咁買咗好多零食，點知到俾錢嗰陣，先知原來大家都冇帶錢。」她們最後只好回到酒店拿錢再買。
