容祖兒《Pretty Crazy演唱會》第17場，請來Supper Moment做嘉賓，點知祖兒台上開口夾着脷，明明講個「調」字，但Supper Moment主音Sunny就畀佢嚇一嚇，反問：「我聽咗另外一個字呀！」笑爆全場觀眾。
昨晚介紹嘉賓之前，祖兒話：「啲人日日打電話問我，你今晚咩嘉賓？有咩嘉賓咁重要咩？依家嘉賓係主菜，定我先係主菜？豈有此理！哈哈。我話俾大家聽，我今日唔俾主菜你哋食，直接俾個宵夜你地嘆，準備好未？」然後Supper Moment就升上來，觀眾馬上瘋狂歡呼，Supper Moment主音Sunny話：「永遠係香嘅主菜，容祖兒！」繼而在觀眾瘋狂歡呼聲中，與祖兒合唱《幸福之歌》。
唱完歌，祖兒見觀眾瘋狂開心，於是話：「完全感受到Supper Moment的威力！」Sunny就話：「我地Supper Moment第一次紅館四面台，係因為你呀容祖兒！」祖兒回應：「唔好客氣，係我光榮。今次第一次合作，大家覺得點？我知大家好熟佢哋，我都要鄭重介紹一下Supper Moment四個靚仔有才華的樂手。我今日先知Sunny叫時燊，你時薪幾多？」之後祖兒繼續話：「我心裏最想合作伙伴單位，請曬來，今日大家見到係Supper Moment，我即刻問可不可以調……即係問可不可以調來睇……」Sunny呆一呆未及反應，之後先笑住話，「哦，調，我聽咗另一個字呀，哈哈哈……比人調喎……」引得全場都一齊大笑。
「哎吔！我真係唔好講太多，哈哈哈……你係咪有禮物送畀我？」Sunny話：「係呀，我今日終於可以係容祖兒面前告解！」觀眾一聽《告解》兩字即開心歡呼，祖兒就話：「真係連霆鋒來嗰晚都冇唱呀。」Sunny就話：「放心，我會盡量用謝霆鋒個腔口唱！」
演唱會安歌時段，祖兒演唱會被歌迷騎劫求婚，祖兒問:「你地唔好咁過份喎……係咪求婚？點解咁突然？俾我睇下你隻戒指大不大隻先。」然後祖兒同女歌迷講：「戴咗佢啦！錫啖先啦，恭喜晒！」女歌迷拿住花喊住同祖兒講：「花以為送比你……」祖兒話：「係屬於你㗎啦，我心領啦，我送首《華麗邂逅》俾你啦，祝你哋永結同心，恭喜晒，生多幾個。」
