近年黎發生好多關於乘客搭交通工具，因不當行為而引發衝突嘅事件。運輸署為咗推廣「搭車顧自己，都要顧人哋」嘅訊息，邀請到影后葉德嫻(Deanie姐)拍攝宣傳短片，提醒大眾乘搭公共交通工具時要守禮。短片出街後，獲得很大迴響。
3分鐘嘅宣傳片中，Deanie姐遇到多個行為不當嘅乘客，例如喺車廂中飲食、亂衝入車廂差點撞倒大肚婆、開大電話聲量睇片、獨佔扶手柱、霸佔座位、低頭玩電話等，正義嘅Deanie姐訓導主任上身當面斥責、糾正自私嘅佢哋。
最後，Deanie姐提醒大眾：「搭車都要顧人哋！」期望乘客互相尊重、以禮相待，唔好對其他人造成影響。
唔少網民都大讚呢條宣傳片貼地，完全講出佢哋嘅心聲，「簡直幫我抒發晒搭車以來積埋嘅不滿！」、「如果多啲咁正義敢言嘅香港乘客就好！」有人感慨留言：「搞到要拍個廣告教細路咁教香港人點樣尊重人，點樣做個好乘客，都幾悲哀。」另外，亦有人建議應加背包友、剪指甲、病不戴口罩等乘客，加強宣傳片內容。
圖片來源：運輸署