大台小生黎諾懿自從拍完《BB來了》飾演新手爸爸，唔少網民都更加留意佢同小春雞之間嘅互動，而黎諾懿都好識得氹大家開心，成日都post佢同囝囝嘅自拍照同影片上去Instagram，令大家可以見證佢成長。而日前呢位暖男爸爸仲化身大廚拍片示範點樣整蘿蔔糕，做個一百分好老公。
從片段可見，諾懿用刀切蘿蔔時有板有眼，好熟手將蘿蔔切成條狀，而開米漿和炒蘿蔔時亦功架十足，成品更係令網民睇見都想食。雖然唔知佢整得有冇鼎爺咁好食，但係筆者就覺得誠意同愛心滿分，因為整一底蘿蔔糕閒閒地都要兩個鐘，點解唔選擇直接唔落街買呢？對於一個大忙人來說，佢大可以用呢兩個鐘嚟瞓覺或出騷賺錢，而黎諾懿就決定用呢啲時間嚟整蘿蔔糕，準備同一家三口過年，可想而知呢個住家男真係嫁得過啊！
圖片來源：黎諾懿@Instagram
影片來源：黎諾懿@Instagram