大台劇集《降魔的》雖然已經播完一段時間，但劇情同續集伏綫仍然成為網民討論熱話，而劇中常常播放的插曲更登上各大音樂平台的熱播排行榜。若要數到劇中最洗腦的一定少不了由石敢當（胡鴻鈞飾）主唱的〈遙不可及〉和〈到此一遊〉，事關每次有催淚劇情同生離死別都一定會播一兩句，牽動每位觀眾的情緒。
唔知石敢當係咪知道觀眾掛住佢嘅歌聲，近日佢喺社交網上傳咗一段同莫有為（蔣志光飾）合唱嘅〈遙不可及〉，唔少網民聽完仲紛紛表示呢個acoustic 合唱版本特別好聽，仲建議胡生一定要參加《我是歌手》同《蒙面唱將猜猜猜》等更多人認識石敢當嘅歌手身分添。話說回來，呢個合唱版本一剛一柔真係配合得天衣無縫，Hubert嘅輕柔突顯出蔣志光唱歌出身硬橋硬馬嘅唱歌功架，亦令人聯想起佢之前再唱〈相逢何必曾相識〉驚為天人。
估唔到繼〈越難越愛〉同〈陪著你走〉，《降魔的》嘅插曲都變埋洗腦歌，每次一聽到前奏都起晒雞皮，就算冇追睇晒全套都會諗起小馬（馬國明飾）同親生父母相認、龍貓回魂同些粉互訴心聲同埋啤啤苦戀等等嘅情節。最後，劇集嘅成功唔單只令一眾演員爆紅，仲令到男歌手胡鴻鈞人氣急升，今年有機會競逐叱咤我最喜愛男歌手，實在是Win Win雙羸。
圖片來源：互聯網
影片來源：胡鴻鈞@YouTube