黃淑蔓（Feanna）主演的微電影《深房I am not alone》，於昨日（14日）舉行的第十一屆微電影「創＋作」支援計劃（音樂篇）頒獎典禮暨精選作品放映，勇奪專業組三項大獎：導演吳詠琪奪得「最佳微電影製作」銀獎，Feanna憑出色演技奪得「最佳微電影女主角」金獎，攝影指導趙沛源則奪得「最佳微電影攝影」銀獎。評審大讚《深房》有絕對的電影感，製作技術相當出眾。
首次奪得演技獎即摘下女主角金獎的Feanna非常感動，她於台上感謝導演吳詠琪、公司寰亞、同事以及家人的支持時，一度眼濕濕。她特別感謝客串演出的鄧家杰（Kakit），說：「我好少演感情戲，對住佢冇咁緊張，同埋少女心爆滿，多謝Kakit。」奪得「最佳微電影製作」銀獎的吳詠琪則恭喜《深房》的一眾台前幕後，並多謝寰亞：「佢哋睇完個劇本就好放心將個女（Feanna）交咗俾我。」她們隨即與Kakit互相祝賀，又親吻獎座分享奪獎喜悅。
Feanna於頒獎禮後受訪時表示很開心，亦為她於演戲上打下強心針。她說：「開頭唔敢相信，知道咗呢個咁好嘅消息，真係好開心，演戲方面相信自己多咗。」她於戲中飾演一位沉溺分手傷痛，還遭受鄰居噪音困擾的女生，情緒低落且沉鬱。她說：「平時好少將呢面展露俾朋友睇，喊都好少喺人面前喊，今次係好大突破。我媽咪同我講：『你喺戲入面好恐怖。』我覺得係讚賞，可以令你覺得我恐怖，對我嚟講即係成功。」
Feanna為拍這片第一次上演戲班，亦第一次參與作曲，主唱主題曲《I am All Alone》的Feanna透露：「其中一位評審問導演，女主角會唔會試下作歌，就係呢句激起咗我嘅鬥心。」談到團隊會如何慶祝時，身體抱恙的Feanna說：「我仲病緊，唔可以食大餐，希望快啲好返，我要同大家打邊爐。」
