無綫劇集《靈戲逼人》昨晚（28日）播出大結局，最後一集Big Boss江志強（吳瑞庭飾）惡人有惡報意外中劍身亡，阿駿（張振朗飾）則受傷昏迷送院。阿駿昏迷後因沉醉美夢不願醒來，夢境中阿駿變回上一世的曲行雲（張振朗分飾），與柳芳（龔嘉欣飾）開花結果結婚生仔。柳芳進入阿駿夢境後，驚揭阿駿昏迷不醒真相，雖然阿駿用情之深令柳芳大為感動，但為了讓阿駿重拾意志趕快甦醒，柳芳忍痛離開屬於「雲芳」的愛情美夢，最終雖成功喚醒阿駿，但二人仍是難逃生離死別‥‥‥
昨晚阿駿與柳芳含笑忍淚告別場口相當精彩，出名喊得的嘉欣，既要裝作瀟灑、強顏歡笑讓阿駿放心及放手，同時又因內心極度不捨數度淚崩，原本「笑容」與「眼淚」交戰的畫面已令人動容，配以全程哽咽tone講對白，更是我見猶憐，她滿眼淚花的靚靚喊樣，亦令人看得更投入。至於振朗亦表現出深情男一面，含淚道別愛人之餘，眉宇間亦盡是愛意及溫柔，兩位主角的演出為結局增添淒美。不少網民邊看邊嗌感動，並對男、女主角演技給予正評：「喊足一集」、「嘉欣的眼淚在眼眶裏打轉一幕，十分淒美」、「大結局！眼淚大放送」、「忍住眼淚講的對白真係心酸酸」。
嘉欣早前為劇集宣傳時，笑言拍攝大結局時與振朗都喊得好誇張，振朗對此形容嘉欣：「直頭喊到想嘔。」他並透露接到劇本時，已深深被觸動：「呢兩個『人』一路以嚟行咗咁長嘅路，由冇可能相遇，到去到慢慢建立咗感情，阿駿仲幫阿芳搵埋曲行雲，點知搵咗咁耐原來阿駿就係曲行雲，而到搵到嘅時候，竟然就係柳芳要走嘅嗰一日，好多嘢都係偏偏擦身而過，雖然佢永遠就喺我隔籬，但我永遠掂唔到，因為佢係女鬼，去到以為掂到喇終於，點知佢又要走，呢個故事真係好淒美，好多謝監製同編審度咗個咁好嘅故事。」振朗更笑指最近出街經常被稱呼為「雲哥」：「啲觀眾喺街見到我都叫我雲哥，『你去咗邊呀？』，好多人咁樣問我。」
昨晚劇集的ending部分亦在網絡掀起熱議，事緣柳芳告別後，阿駿雖然很傷心，但仍選擇勇敢重啟人生，及後阿駿在音樂比賽中，竟遇到與柳芳長得一模一樣的女孩，女孩在台上開心地為阿駿和唱的同時，更以淚眼含笑望着阿駿，劇集最終以「駿芳」的含淚冧樣作結，加上阿駿一句：「只是我怎麼也沒想到會再見到她」，啟動網民「思考」Mode，留下開放式結局。對於結局，振朗親自解說：「Open end係好事，所有嘢已經好sad，唔使sad到盡頭，觀眾睇咗會唔舒服，我覺得依家所有嘢要有希望，過程幾傷心都好，最緊要係見到曙光。其實ending嗰度，wide shot時已經有三個人企喺度，但無啦啦阿駿望到中間嗰個係阿芳，其實喺第一集同一個hall入面（其實係同一場比賽，只是首尾呼應），阿駿講過佢以為淨係喺唱歌嘅世界入面、想像先可以有無限嘅空間，咁所以最後到底呢個係阿駿天馬行空嘅世界，定佢真係見到阿芳？就等觀眾自己感受。」龔嘉欣昨晚亦在社交網留言，感謝振朗及粉絲支持，並期待再與振朗合作，嘉欣表示：「曲行雲 雲柳芳 前世今生 終於完結。多謝大家喜歡我們這一對，感謝拍檔總是投以信任，才能產生這麼好的火花，期待四搭‥‥‥多謝大家喜歡阿芳。」
