由《香港小姐再競選》獲得冠軍何沛珈（Roxanne）及亞軍李芷晴（Stephanie）主持的無綫旅遊節目《請1日假去旅行》，昨晚（17日）一集繼續玩轉曼谷，齊齊租借泰服到鄭王廟影靚相。打卡期間，Stephanie化身攝影師，幫Roxanne影靚相，卻慘遭Roxanne嫌棄其影相功力，嚷着要導演接手拍攝，場面搞笑。兩人去到曼谷當然要做Spa，又齊齊晒玉背，期間更瘋狂鬥嘴，Stephanie笑言Roxanne的背脊捽出萬年老泥！
昨晚的另一亮點，是兩位靚女將化身一日女友，以男友視角方式和觀眾拍一日拖！Roxanne着到靚一靚化身性感小野貓，帶大家到有「泰國蘭桂坊」之稱的熱點夜蒲，暢飲特色蜜糖Cocktail，更親手餵觀眾飲埋一份，甜度爆錶！另邊廂，Stephanie則化身文青女神和大家參觀曼谷設計周，影靚相打卡之餘，還對住鏡頭瘋狂撒嬌，大晒可愛一面。
另外，兩人還到了夜市接受製作組考驗，就是只能花1,000泰銖、但卻要買齊10件手信，有選擇困難的Stephanie全程遊魂，Roxanne則出盡牙力係咁講價，場面過癮。Roxanne事後受訪時透露「1,000泰銖挑戰」十分難忘，她說：「因為要以有限嘅金錢去買到10樣嘢，我要好厚面皮地去瘋狂講價，同埋我哋係分開去拍攝，要令成個拍攝冇冷場，真係一啲都唔容易。」
節目尾聲，Roxanne、Stephanie一起換上泳裝，浸在泳池進行深度交流互訴心聲，期間二人都感觸至眼紅紅，又邊說邊手牽手互相支持。Roxanne哽咽：「我哋由《再競選》‥‥‥（忍淚）我都入咗行兩年，我都未試過同一個女仔咁Close‥‥‥未試過呢個體驗‥‥‥」聽到眼濕濕的Stephanie則說：「可能大家都好大壓力，大家都覺得競爭對手嚟㗎喎，點樣做朋友呀，有時我都覺得你會唔會唔鍾意我呢？」她們因是次行程成為好友，日前一起開Live與觀眾互動，Roxanne驚爆二人會「肉帛相見」後，Stephanie隨即大爆Roxanne「浴巾」的秘密：「佢會著住浴袍周圍走！」Roxanne聞言反問：「有浴袍咁多呀？」Stephanie即再補充謂：「後尾就過份啲，但第一日未係好熟嘅時候，佢就咁沖完涼著住浴袍行出嚟，好彩你冇打開俾我睇咋。」
