一連兩集台慶綜藝節目《芷珊再約王嘉爾》將於周日（23日）晚首播，主持黎芷珊與製作組親赴曼谷直擊王嘉爾（Jackson）開騷盛況，以及再度深入探討Jackson內心世界。
談到突然決定休息一年的導火線，Jackson坦言並非單一事件，期間還流露了找不到擁有共同目標拍檔的那份無奈：「最重要唔係嗰件事，最重要係（啲事件）一齊360（意指所有不好的事一起發生）。對我嚟講，譬如話你呃咗（我）錢，呢啲係物質上嘅嘢，我覺得It’s ok，咁我賺得番咪得囉。同我工作嘅人，我覺得大家都係friend吖，但邊有得嚟咁多friend吖，你嘅夢想係你嘅夢想啫，人哋都有自己嘅夢想…我覺得人愈大係真係要撞板，咪當交學費，但個問題係個心。」
Jackson續指由於年少出道，故嚴格來說很多事情對每一個階段的他來說、都是不易應付的，Jackson：「我十歲練體操、之後再練劍擊，突然間天時地利人和遇到星探，之後就去韓國K-POP。我出道19歲，（嗰時）我係未ready社會，我連form 7都未畢業，你話咁嘅年紀我識鬼社會咩？！（然後）愈嚟愈多人見，我唔知點樣handle呢一切…」。
談到最低潮時期，Jackson坦言有想過「唔想再活下去」：「最唔開心、最down嗰時，係乜嘢諗法都有諗過㗎…其實你冇時間去反應，只係覺得我乜嘢都唔想做，好似覺得自己都唔知自己係邊個…我係諗過我唔想再活落去。（芷珊：吓？）係有㗎，我自己都Surprise，因為我由運動員、到練習生、再出道去海外，我覺得我係捱到嘅…」。
