大劉劉鑾雄早前被影到與前女友呂麗君（現名呂姵霖）在銅鑼灣皇室堡同行，被指二人是分手八年後首次合體，大劉其後已發出聲明澄清，不過因各界仍然對事件提出不少疑問，所以他決定開記者會親身交代事件。
大劉在今早十時四十五分步入會場，整個記招歷時個半鐘，一直坐着發言的他在記招期間曾六度站起來，他首先提到網上流傳的影片，片中的他在自己旗下的皇室堡大罵踎地男，「點解我咁避忌，我換過腎，一直食緊抗排斥藥，雖然打了五針，但只得常人四成的抗體，我不是怕死，我還有三名子女，他們分別四歲、十歲及十四歲，想活多幾年睇到他們成長，我中招是九死一生，話我潔癖是廢話，個男人阻住條路，我隨時會被棘低，同人太近接觸又有機會中招，亦可能被人嗌非禮，話我燥狂症一定沒有，但創傷後遺症就有，每個月至少有十個人上來我公司，白撞、搵笨及敲炸，多則有二、三十人。」
對於蕭若元在元旦日，於自己的網上頻道「蕭氏新聞台」評論大劉發出的聲明澄清與呂麗君沒來往，是要平息甘比的妒忌心，大劉直言可憐對方為搵食而在網上呃like，「他自稱跟我很熟，食過十幾次飯，單獨也見過幾次面，我跟他只見過一次面，是在黃玉郎的公司，當時有問黃玉郎用多少錢請他，三十六、七年前已經廿多萬人工，黃玉郎說他英文很好，在英國派報紙及派牛奶也有很多人英文很好，我同情他，欠債避走台灣，個仔又破產，佢搵到食使乜咁吖，如果我有一日要喺平台咁呃like呀，我就大乜X鑊啦！」
其實多年以來，網絡上有關於大劉的傳開非常之多，當中更有不少牽涉到性和暴力，大劉在今日的記者會上主動提出怨屈：「我谷咗氣好耐，之前啲人話我塞春卷，我無做過，諗都絕子絕孫，把口在人地度，話塞春卷呀、乒乓波、網球、遲啲話我鍾意畀人塞，之前不澄清，係怕蟻多嬲死象。」大劉過去在圈中有不少緋聞女友，有指他對部分舊愛仍有經濟援助或助養，他直指有些娛樂圈女友是賤到無倫，「有啲無良心嘅，有啲賤到無論嘅。我講娛樂圈都有唔少㗎，賤到無論嘅人。我呢度講兩句吖，就唔會開名喇，費事搞出大鑊。以前有個女朋友，兩姊妹夾埋冒簽我名，整張假文件去電油公司，申請張油卡，佢又唔好彩畀我會計部check咗出嚟，我都無去報警，如果報警就衰梗。我淨係話『喂，你哋太狼喎，咁都得嘅』，我淨係提佢，如果我報警佢死硬嘅。我都無咁做。」言下之意即有人冒他簽名詐騙金錢，他其後又表示：「乜人都有㗎呢個世界…好似油卡呢啲咁，你諗唔諗到佢會咁做？一個月萬幾蚊電油之嘛，都殺嘅！但係犯法㗎喎，清唔清楚意思呀？」
對於蕭若元在節目中指他一生中最愛是李嘉欣，他就表示不想再有人造謠：「蕭才子話我最愛係李嘉欣，咩The One，唉…好多嘢谷谷埋埋。」他指集團旗下位於尖沙咀的物業The One，是由他兒子劉鳴煒取名，與他無關，「個大廈名係我個仔劉鳴煒改，我本人喺任何思想，任何環境之下，都未諗過一個叫『The One』呢個字出嚟，我唔知你哋明唔明白我講乜嘢。」
他還揭當年盛傳他於報章頭版刊登示愛廣告，以「The One」賀舊愛李嘉欣36歲生日的真相，「我個人呢就好肯幫人嘅，當有啲人想搵老襯，成個廣告版隊埋嚟，叫我搵啲秘書去登廣告，我都會照幫手嘅，咁樣仲聽唔明？我都話我本人從來都無諗過個字叫『The One』，工作上都私人都無諗過。(蕭若元話The One係你一生中最愛？) 超，咁我依家講咗你明唔明白呀？個稿係人哋交嚟叫我秘書去登，就借我秘書去呃個老襯囉。」他續說：「結咗婚兩三年呀，一年都同我攞幾個鱷魚皮、鑽石手袋啦。」
大劉又罕有提到有關暗示他的性暴力傳聞，大劉先問在場記者，有沒有聽過他在福臨門塞春卷及乒乓波，「我有諗過都絕子絕孫呀！」他稱過去有很多事沒有解釋，一直啞忍，因為只有沒完沒了的傳聞，「澄清得幾多呀？乜嘢都有人講，又話掟支票、話塞春卷呀、乒乓波、網球呀，乜都有，好多傳聞係人哋，但就傳到去我度，我又唔想累人，俾人知原來啲名人咁變態。」
至於有傳呂麗君因投資失利，要找大劉出手相助，大劉直言所做的都是為了一對子女，「呂小姐有咩困難，真係唔想講，我今日留一線，他朝好相見，唔會趕盡殺絕，你哋去問財經界的人，就好快會知，若不是為了仔女，我極度唔想幫，我平時用零點一秒就可下決定，今次想了兩分鐘，不想有難堪的事影響子女，保留一點尊嚴給子女，我希望記招之後會收斂點。」大劉又表示跟現任太太甘比結婚兩天就處理財產問題，「我將所有財產送出去，寧願俾錯人，都唔可以益天下極壞的恐怖份子。」他又澄清絕對沒有接受甘比母親捐腎移植，「又有傳言說我為何跟陳凱韻結婚，因為佢媽咪俾個腎我，要報恩，我換腎都揀個後生啲，唁會搵個六十幾歲老腎。」
