藍奕邦今日（12日）推出新歌《命》作為2023年第二首全新單曲。歌曲創作追溯至2017年他於加拿大休養，當時無論是身體還是情緒亦處於低潮期的他，重返舞台可謂相當遙遠，但是新歌的出現，成了他的最大鼓勵。藍奕邦說：「嗰陣聽歌大聲啲都耳仔痛，講句嘢又無氣，何況唱歌？但係我同自己講，要趁呢段時間寫定一、兩首好勁嘅歌，第日可以復出嘅話都有首歌袋住，就係咁寫咗《命》，寫完我就安心，因為佢真係我最好嘅旋律。」他笑言這個旋律是他激勵自己的「紅蘿蔔」：「我好似隻驢仔咁追住『佢』，鼓勵自己好好休息、調整，因為我點都要好返出到呢首歌！」
藍奕邦曾經如許多人般，認為自己的際遇是個宿命，但他不願服輸，不想自己敗在所謂「命運」之中：「我覺得好多經歷迷惘期嘅人，都聽過唔少呢啲說話，咩『性格決定命運』、『你自己搞成咁』。我只係想講，命不該絕，唔好輸俾所謂嘅『宿命』！我每日好努力逐少逐少爬返出嚟，就係唔想輸俾我條命！」新歌正好與去年推出的《生》組成藍奕邦對生活的看法：「呢幾年嘅經歷，令我對生命有種全新嘅感受，好想同大家分享呢份體會。2021年我生日嗰日（5月15日）收到林夕份詞，咁啱早幾日我又填好《生》，兩份詞剛剛好呼應到對方，好開心。」
MV的構思亦以兩者作個對比，造就這回「潔淨」的感覺，以教堂作故事的背景，促成莊嚴牧師與懦弱助理牧師的角色，描述兩者互相角力的故事。並非演戲出身的藍奕邦自嘲演技平平，幸好有朱栢謙：「我同過好多好勁嘅演員拍嘢，不過啲經驗就唔太好，佢哋會有意無意令我覺得自己演技好垃圾，愈做愈冇信心，但係朱謙令我好自在，搞到我好想再做多啲戲，佢真係呢個MV嘅不二人選。」朱栢謙亦感謝導演及團隊：「感謝由心而發的音樂及歌詞，我愛藍奕邦。」
