港隊花劍代表張家朗、蔡俊彥、張小倫與吳諾弘日前出戰東奧男子花劍團體賽，以第7名完成東京奧運賽事，當中外界稱吳諾弘表現驚喜，更有唔少網民大讚吳諾弘表現熱血。
吳諾弘
吳諾弘賽後表示自己喺團體賽中已盡咗自己最大嘅努力，為港隊奪分，佢表示有賴隊友支持、分擔壓力，令自己可以放開嚟打。對於外界稱自己為「秘密武器」，吳諾弘感覺新鮮，覺得幾搞笑同得意。指自己比較少參加大型比賽，而上咗成人組之後，打團體賽嘅機會亦比較少，所以都好開心有人欣賞。
吳諾弘
吳諾弘亦有同大家交代傷勢，指自己大髀內側肌肉拉傷，已經照咗MRI，顯示有少少肌肉撕裂 ，但返到香港都有短暫假期，會留時間養返好個傷先再去練習，又指自己返到香港最想見屋企人同約朋友聚會。
吳諾弘嘅童星身分都令唔少人關注佢會唔會復出拍劇。吳諾弘稱自己現時都想專注劍擊，而且運動員光陰短暫，所以都想珍惜呢段可以做運動員嘅時光 ，最後又多謝大家嘅支持同鼓勵。
圖片來源：吳諾弘＠Instagram
