王嘉爾（Jackson）入行前曾是香港劍擊代表隊成員，但Jackson用盡方法說服父母，讓他轉換跑道發展，其曾任香港劍擊隊總教練的父親，當時戲言：「攞到冠軍俾你去！」結果，Jackson 在十七歲獲得亞洲青少年劍擊錦標賽冠軍，換來這張「入場券」。
Jackson一四年以韓國男子組合GOT7正式出道，單飛發展登上事業高峰，再創立TEAM WANG design殺入時裝界，「Jackson Wang」這個名字已是國際頂流巨星，在IG的粉絲人數是全球華人第一位，多達三千多萬。
王嘉爾的成功，並不是甚麼贏在起跑線，他所付出的，可能大家也想像不到，他是首批「香港仔」到韓國做練習生，在充滿競爭的「戰場」，言語早已輸蝕，只好比別人多十倍的努力，才跟得上……
上周在新加坡，為了首度與環球影城的合作，現身造勢的Jackson，也為本刊拍攝了封面故事。可能是同聲同氣，Jackson面對香港人，以廣東話接受訪問特別有親切感，他不斷說：「咩都問得㗎，我冇所謂！」記者愈問愈深入，Jackson也無所不談，甚至去年他遇上人生低谷，他都娓娓道來。
二二年，Jackson推出個人首張英語實體專輯《MAGIC MAN》後，歌迷期待已久的新專輯，Jackson終於透露好消息︰「差唔多用咗一年時間去造歌，其實已經完成接近四十首歌了，但有時造咗啲歌，過幾個禮拜再去聽，又覺得好似唔夠，呢個係process（過程），下年一定會出（新專輯）。」
新歌的主題，是關於Jackson貼身的問題，「已經有topic想講，係關於人性！我都出道十幾年了，今次我會覺得，係我第一次為自己造音樂，似係我第一個album，真係講緊自己嘅嘢，自己喺呢個行業經歷過啲乜？屋企人、我愛嘅人等等，全部都有。」
有留意Jackson的社交平台，尤其是鐵粉，都會發現他的笑容比以前少了，身體累了嗎？「自己鍾意做嘅嘢，例如音樂、創作，其實唔會覺得攰，好鍾意添！只要唔好催我，我做得好興奮，但始終都係business嘛，過程中會睇到人性、貪心等等，又遇到好多唔同key、唔夾嘅人，人性係咩呢？利益係乜呢？呢啲都要『交學費』！依家好返好多，尤其呢幾年，遇到好多唔好嘅嘢，好現實，冇話一個好實質例子，係好多嘢加埋一齊，可以話係心靈上一啲emotion。」
大家看到永遠在頂流高峰的巨星，原來都有迷失的時候，Jackson續說︰「高乜鬼峰吖？我都會好lost㗎！呢啲稱號、標籤都只係泡沫，即係，今日好順利，或者今年唔掂喎，唔代表之後都唔掂，最緊要有冇說服到自己，我覺得要move on。」
Jackson當年在韓國受訓時，不但要學韓文，還花比別人更多的時間練習唱歌、跳舞，每天只睡三小時，因為不敢浪費太多時間睡覺，出道至今，去年才終於放了自己一個假期，「我休息咗一段時間，差不多一年，其實係被迫休息，因為狀態唔係好好，當時有抑鬱症，有少少depression……不過，我覺得所有都係最好的安排，咁啱又遇到咁多問題，咁咪當休息吓！我性格唔係好停得手，所以呢，明年返嚟喇！我會好active，唔想見到我都會成日見到我，哈哈！」
化妝︰Simon
髮型︰Han Lee
形象︰JC & JUN
服裝︰TEAM WANG design