香港騙案數字暴增，新片《查無此人》就正正以被盜用身份作為題材，由導演孫立基執導及監製，演員包括鄒文正、余凱祺（Kaylee）、黃定謙、黎紀君（Christy）、陳善渝（Odilia）、張松枝等。故事講述鄒文正飾演的獸醫又是劏房包租公，屋內的一班劏房戶各有不同身份亦各有迥異故事，飾演瑜伽導師的Kaylee是其中一位租客。
女主角Kaylee是新演員，她於城大修讀數碼與電視廣播，今次是首次正式拍電影並擔任女主角，她坦言首日拍戲緊張到失眠，幸好事前跟劇組和導演傾好劇本、角色嘅研究，行位、指示各樣都好清晰，她亦做到預先想像的畫面，故除了首日有少許緊張外，之後逐漸熟習，並愈做愈好。
飾演獸醫兼劏房包租公的鄒文正，表示片內與多位劏房住戶引伸出曲折離奇耐人尋味的不同故事，其角色有陰暗面，與以往演開的大有分別，「今次拍戲最開心嘅除咗有好好角色同埋比較新嘅嘗試之外，戲入面有好多女角色好多女演員，係好幸福一件事，成日開工…都見唔到，哈哈，唔係，因為除咗講好多租戶故事之外，都會同身邊角色有互動，反而唔係太多語言身體嘅接觸，係好多情感上嘅交流，觀眾睇嘅時候可以留心當中意味。」
除Kaylee外，鄒文正與飾演神秘女租客的陳善渝有多場對手戲，Odilia形容同阿正是雌雄大盜，經常化身不同身份，「個角色其實同我都好相似，又係高傲、冷艷，殺人於無形，因為角色要求都幾高，我要著啲好貼身、好靚嘅衫，亦都要有個氣場。我都為角色前期做咗唔少功課，請教戲劇老師，搵健身老師幫我操fit，將我啲少少鬼祟肉遮埋去，詢問營養師點樣喺最短時間keep到最fit、最好狀態，同埋搵美容師處理我嘅皮膚。」Odilia更多謝導演孫立基的悉心教導，令她於短時間內入戲。
至於劉芯寧反串飾演10多歲啞男孩角色，本是長髮少女的她，為啞仔造型來個大犠牲：素顏、戴眼鏡、超短髮、街坊裝，把自小留到大的一把長髮剪掉，更被人誤會去錯女廁。她說：「試過去洗手間，有個女仔拍我同我講：『哥哥，男廁喺嗰邊呀。』尷尬咗一下。」男仔頭亦令她喪失長髮女市場，「長頭髮行出街、出去玩，一定有回頭率，可能攞住好多嘢，有男仔獻殷勤幫我攞下，但係依家全部冇晒，都有少少落差，唔係好舒服。」但她覺得為角色都係值得。
