組合天堂鳥（BOP）將於8月14日在九展開騷，今日舉行記招，屬同一公司的關嘉敏、陳善渝、龔柯允亦到場支持。提到組合已解散，卻仍依然開演唱會，Lincoln表示：「因為之前應承咗fans開騷，我哋都想搞最後一次嘅演唱會，所以留個紀念，今次唔做唔知幾時可以再做。」更藉此答謝音樂人造歌：「唱過嘅歌未必紅到，所以唱番晒回饋答謝一班音樂人。」 Gordon則表示：「記得我哋初初出道嗰陣都有成為一時熱話，開心樂壇咁多人支持番，冇話可唔可惜，啲人話我哋生不逢時，但冇嘅，我哋呢7年嘅時間都開心。」他們又透露已邀請一隊組合任嘉賓。解散後，3人會各自發展，成員Tyrese專注園藝生意，「之後都可能會繼續唱歌，可能會喺花場唱歌，或玩busking。」之前Gordon與Carman傳分手不和，問到與Carman演出會否尷尬，Gordon笑言：「唔尷尬，一齊跳辣身舞都得。」
