林奕匡（Phil）早前應邀參與日本著名音樂頻道The First Take（TFT）的一鏡到底一次性錄音演出，演繹了全新編曲的《高山低谷》。Phil昨晚（5日）開Live談及參與TFT以及即將為人父的感受。
Phil是繼陳柏宇及MIRROR後，第3位香港歌手參與The First Take錄音，他為此作出了周詳的準備，他道：「我哋重新度過首歌嘅編排，同埋唱法都唔同咗，會諗下受眾係邊個，唔想一模一樣嘅感覺去唱，因為都事隔十年，自己嘅人生同經驗會令自己有唔同感受。我都有練習多啲，仲特登買咗正式錄音時會用到嘅Headphone喺屋企練習，又會睇下唔同嘅表演者喺TFT會點唱，台風係點，又研究下鏡頭擺位，自己喺屋企事先預演一次，希望可以減低緊張程度。」進行錄音時，Phil初時以一貫的微笑表示：「Okay I’m Ready!」然後便陶醉於音樂之中。錄音過後，Phil即時鬆一口氣，他道：「當下第一時間諗到『Oh My God!錄完喇！』因為籌備期間練習幾多次都好，正式嘅時候係有好多Pressure（壓力），但完成嗰一下成個人即刻放鬆，可以真係Enjoy The Moment多啲，我仲同每個同事都擁抱！」能夠在《 高山低谷》推出十周年登上TFT，Phil坦言是莫大的榮幸，「能夠唱廣東歌實在太好，希望可以俾全球認識廣東音樂。」
日前Phil宣布太太陀B，他昨晚開Live分享道：「我唔覺得自己而家喺高山，因為覺得可以再好啲，同時亦都會提醒自己唔好俾自己入到低谷，繼續鞭策。」當談及BB的時候，Phil仍難掩將為人父的喜悅，他透露：「今（昨）日開Live前啱啱陪太太睇完醫生，BB又大咗好多，今（昨）晚又有另一個BB TFT出世，的確係開心！」